MPL Under 18 Final Nomawi inchuh tur Chhinga Veng leh Police

Mizoram Premier League Under-18 chu vawiin chawhnu dar 2:00 hian Lammualah final khelh a ni dawn a, champion lai Chhinga Veng leh Mizoram Police ten nomawi an inchuh ang.

Chhingcows hian final lut turin Thawhlehni zan khan Chanmari FC 5-1 in an sawp a, Police hian Aizawl FC 2-1 in an barakhaih. Academy mumal tak kalpuitu I League club mak ang reng takin MPL kum bithliah inelnaah an la champion lo.

Semifinal chu

Chhinga Veng hian Chanmari FC an sawp ṭum hian F. Lallawmkima chuan ṭan aṭanga minute ruk chhungin goal hnih a khung bakah F. Lalnuntluanga, Lalramhmachhuana leh C. Lalchungnunga ten goal khat ṭheuh an khung.

Chhinga Veng hian goal khung thiam an ngah bakah goal hmasa pahnih siamsaktu Lalbiaknia a hmuhnawm a, Chanmarians tana hun tawp dawna F. Lalhruaitluanga goal khung chu mualpho hliah khuh nan a tawk zo lo.

Semifinal hnuhnung zawkah league round-a goal 23 khung thei Aizawl FC chu semifinal-ah ze ngai an chhuah thei lo a, Mizoram Police lakah an tlarhma a bil. Police lamin chawlhlawk hma chiahin Lalmuankima hmangin goal hmahruai an khung.

Second half ṭantirhah Techi Tatra pet chu Police keeper H. Lalrintluanga'n a dang per a, Tatra hian a per chu siphurh sut nan a hmang. League round-a goal chhuah tlem dawttu (6 goals) Police an ṭang thei a, minute 80-naa NG Laldinpuia'n chakna goal a khung a, tawnhriat nei coach Lalramhluna'n a team final a hruai thleng.

Final chu

Nikum khan Chhinga Veng hian Dinthar hnehin a vawi khat nan nomawi an chawi, kuminah group hmahruaitu nichungin an tlang bakah league round 4-a an intawn ṭumin Mizoram Police hi 2-1 in an hneh a, champion zawn thei tura ngaih an ni.

India sub junior tan pawha khel tawh leh talent nei ṭha Chungnunga te an awm avangin Chhingcows inkhel en a châkawm tel bawk a, amaherawhchu an khingpui tur Police hian final lut turin Aizawl FC an hneh thei a, eng team ve ve tan pawh ngaih ṭha taka awm theih a la ni lo.

Semifinal Results
Chhinga Veng FC 5 - 1 Chanmari FC
CVFC : F. Lallawmkima 4', 6'; F. Lalnuntluanga 52'; Lalramhmachhuana 62'; C. Lalchungnunga 80'
CFC : F. Lalhruaitluanga 89'
Aizawl FC 1 - 2 Mizoram Police FC
AFC : Techi Tatra 55'
MRP : Lalmuankima 44'; NG Laldinpuia 80'
Final Kalkawng
Round 7
Chawnpui FC 0 - 9 Chhinga Veng FC
Mizoram Police FC 0 - 0 Aizawl FC
Round 6
Ramhlun North FC 1 - 2 Chhinga Veng FC
Chawnpui 1 - 3 Mizoram Police
Round 5
Ramhlun North FC 0 - 3 Mizoram Police FC
Chhinga Veng FC 1 - 0 Bethlehem Vengthlang
Round 4
Chhinga Veng FC 2 - 1 Mizoram Police FC
Round 3
Mizoram Police 1 - 0 Bethlehem Vengthang
Chhinga Veng 2 - 0 Chanmari FC
Round 2
Mizoram Police 2 - 2 Chanmari FC
Chhinga Veng 2 - 2 Electric Veng
Round 1
Mizoram Police 2 - 2 Electric Veng
Chhinga Veng 3 - 1 Aizawl FC