MPL7-ah top scorer tur hriatthiam harsa

Mc Dowell's No. 1 Soda Mizoram Premier League-ah league round khelh zawh a ni a, goal 141 lut tawhin top scorer inum boruak a la sang hle.

Chhinga Veng forward MS Dawngliana chu hattrick siam awm-chhun a la ni a, goal sarih khungin top scorer a la ni mek.

Semfinal match hnih leh final khelh hmabak a la nih avangin season tawpa goal khung tam ber tur a la hriat lo a, MPL hmasa ber top scorer Dawngtea hi rinkai zinga mi a ni ang.

David leh Thanga

MPL7 ṭan tirha hming langsar chu Electric Veng striker David Lalchhuanawma a ni a, season chanveah goal ruk khungin hmahruaitu a ni. Amaherawhchu, Salem Veng tlangval hi a inhliam vangin season chawhnu lamah a inlan tam lo a, goal a khung zui tak loh avang leh Electric Vengin semifinal an thlen zawh loh avangin top scorer beiseina a tawp.

Chawnpui winger Vanlalthanga'n season ṭha tak a hmang a, Hualngohmun tlangval hian a club khelhna hi knockout stage thlenpui lo mah se khelmuala a hnathawh avangin fak a phu. Thanga hian goal ruk a khung a, Aizawl FC lama halfway line pelh hret aṭanga a goal ropui chuan hriat zui reng tlak a ni.

Dampuia a rawn lang

MPL5 top scorer Laldampuia hi tun season ṭantirh aṭangin a inlan a, Kawrtethawveng tlangval hi round 11 thlengin score sheet-ah hming a lang lo a, a club khelhna Chanmari FC chu knockout stage lut lo thei dinhmunah an ding.

Dampuia hian Ramhlun North an hmachhawn ṭumin goal hnih an phur hnuah beiseina an neih theih nan goal a khung a, minute 90 zawhah point khat an hlawh chhuak.

Hemi hnu hian BVT 2-1 a an hneh ṭumin goal hnih a khung ve ve a, Aizawl FC an hneh ṭumin goal awm chhun a khung. Chanmari forward hian match hnuhnung pathumah goal khung vekin goal li a khung tawh a, tuna a chet dan en chuan top scorer la ni ve thei a ni.

Lengpui tlangval Remsanga

Aizawl FC forward F. Lalremsanga hi tualchhung football ngaina tan chuan hriat hmaih chi a ni tawh lo a, a khelhpui foreigner-te pawhin a thawhrim zia leh hmabak a neih en zia an sawi fo a, tunah hian goal nga khung tawhin top scorer turin a hming thai chhiat la rem lo.

Gift Raikhan-a hoten Inrinni tlaiah East Bengal an hmachhawn dawn a, Thawhṭanni zanah Mizoram Police an hmachhawn lehnghal dawn avangin MPL-ah Remsanga hian hmun pawimawh a chan a rinawm a, Lengpui tlangval hian goal a keng tel ang em tih erawh hunin ala hril ang.

Zama a te ber lo

Chanmari FC forward Lalnunzama'n MPL match hmasa pangaah goal a khung vek a, mahse kum lama a naupan avangin coach an thlak hnuah khelhna hmun a chang tam tawk lo. Round 12-a Ramhlun North nen an inhnehtawk ṭumin bench aṭanga lutin siphurh sutna goal a khung.

Mak ang reng tak chu Chanmari tlangval hi palian ni lo mah se goal ruk a khung zinga goal li hi a lu hmanga a khung a ni, ke dinglam hmangin goal hnih a khung tawh bawk.

Top scorer nilai Fakzuala

Mizoram Police forward Lalfakzuala hian season liam ta khan goal 10 khungin top scorer a ni a, tun season-ah Malsawmfela nen an inkawp chungin goal khung a bansan lo. Armed Veng tlangval Fakzuala hian goal ruk a khung tawh a, tawnhriat a ngah bakah mawhphurhna a lak ngam avangin match khelh hmabakah hian goal dang a khung belh ngei a rinawm.

Fakzuala goal zinga hriat reng tur chu match hnuhnung bera Electric Veng lama a tauh luh a ni a, he goal vang hian Police-in semifinal an luh phah a, MPL club tharin knockout stage an luh loh phahah a ngaih theih bawk.

Dawngtea ke dinglam

MPL hmasa berah Dawngtea'n Chanmari FC tan khelin goal 10 khungin top scorer a ni a, season hnihnaah Bawngkawn tlangval hi best forward-ah thlan a ni leh bawk. Amaherawhchu hemi hnu hian Dawngtea hian MPL-ah mimal lawmman a dawng leh tawh lo a, player ṭha zinga mi ni reng mah se ṭha ber a ni ta loah a ngaih theih.

Tunah erawh Dawngtea a rawn intuai thar a, Chhinga Veng squad chhah tawk loh avangin rin tur dang a nei lo a, innghahna tlak nih zia a rawn lantir.

Chhingcows forward hian goal sarih a khung tawh a, he goal zawng zawng hi a ke dinglam veka a khung niin semifinal khelh hma bakah pawh ke dinglam hlauhawm ber a ni chhunzawm ngei ang.