Electric Veng tel loin a kim lo
Mc Dowell's No. 1 Soda Mizoram Premier League Season 7 semifinal khel tur zingah Electric Veng an tel lo a, season tluana an khelh dan thlirin knockout stage-a an awm lo hi league tan channa nasa tak a ni.
MPL club thar EFC hian league round 14-ah round hnuhnung berah chiah a sang paliah an awm lo a, khelmual chhungah team hmuhnawm an nih bakah supporter nei ṭha bera chhal theih an ni.
Chenna ngai lo ramah
Electric Vengin MPL ṭan nan Mizo club zinga thleng sang ber Aizawl FC chu 2-1 in an hneh a, MPL club anga an bul ṭanna hmasa ber I Day Football-ah I League club hi an hneh tawh bawk avangin 'vannei' an ni lo.
EFC fixtures a hautak a, an hmaah Mizoram Police, Chawnpui, Chanmari FC leh Bethlehem Vengthlang te awm chhoin anmahni ang bawka kai thar Chawnpui tih loh chu an hneh vek. Round 5 khelh zawh chuan point 13 hmuin hmahruaitu an ni.
Amaherawhchu, round 6-ah champion lai Chhinga Veng an hneh lo a, a vawi khat nan MPL-ah hneh loh an tawng. Hemi zawh hian Serchhip-ah zinin Ramhlun North chu 2-1 in an hneh leh a, phase 1 khelh zawhah point 16 an hmu tawh a, semifinal an thlen ngei a rinawm tawh.
A kal sual ta
Electric Vengin phase 2-ah an hneh loh awmchhun Chhinga Veng an tum nawn a, goal khung hmasa chungin an chak lo. Table hnuai lama awm Ramhlun North nen an inhnehtawk avangin pressure an nei ṭan ta bawk.
EFC-in insiamṭhatna remchang an nei a, table mawnghphaha awm Bethlehem Vengthlang an hmachhawn a, point thum hmuh theihna tura an ngaihah point an hlawh chhuak lo a, hei hian a tawp thlengin nghawng a neih phah niin a lang bawk.
Chanmari FC nen an inkhelh ṭumin 2-0 in an chak lo a, an player pathum ngawt hnawhchhuah an nih avangin Aizawl FC an hmachhawn
ṭumin kim loin an khelh a ngai a, an chak loh phah bawk. Electric Vengin match nga tawp chak hmel an hmuh loh avangin a dinhmun a derthawng a, amaherawhchu Chawnpui an hneh avangin beiseina an nei thar a, hei chiah hi phase 2-a an chak awmchhun a ni.
League match hnuhnung berah an elpui Mizoram Police ber kher an hmachhawn a, point khat hmuha tling thei ni mah se tawnhriat an ngah tawk lohna a lang a, an chak lo. Hetichung hian semifinal lut thei an la ni a, amaherawhchu Chanmari FC-in Laldampuia goal hmangin Aizawl FC an hneh a, Electric Veng FC an tla a, an vanduai.
Tawnhriat nei tlem
Electric Veng FC coach Vanlalsawma Colney chuan, "Chanmari FC leh Aizawl FC inkhel kha ka en a, tih theih kan nei tawh si lo a, midang result-a innghah chu a hrehawm hle. Kan tawnhriat neih tlem vang a ni," tiin Vanglaini a hrilh.
An chetfuh loh dan sawi chiangin Sawma chuan, "Bethlehem Vengthlang kan hneh loh kha a pawi takzet a, kan zuam sual a ni. A tawp lamah kha chuan ṭawng lamah pawr viau mah ila kan rilru a huaisen tawk lo a, kan vanduai chiah chiah zel a. Semifinal kan thlen tak loah kha chuan zan mut pawh a har ṭhin khawp mai a, eng mah thlak danglam theih a ni tawh si lo," tiin a sawi.
Electric Vengin player naupang rual khawm chungin team ṭha tak an din a, season tharah tawnhriat neichungin team ṭha zawk an din theih ngei a rinawm.