Qatar 2022-ah team 48 harsa dawn

FIFA president Gianni Infantino chuan Qatar 2022 World Cup-ah team 48 tel tir a duh thu sawi mah se UEFA president Aleksander Ceferin ngaihdan nen erawh a inang lo a, Europe-a football thuneitu sang ber hotupa chuan, "Suangtuahna satliah mai a ni," a ti.

World Cup-ah hian ram 32 an in el ṭhin a, FIFA chuan kum 2026-a USA, Canada leh Mexico-in World Cup an inthlen ṭawm hun atan team 48-a World Cup khel thei zat tih pun chu an rem ti tawh a, Qatar chungchang erawh tun hnaia Infantino sawi a ni thung.

Ceferin chuan, "Qatar hi team 48 thleng turin a inbuatsaih em tih hi zawhna a ni a, hetiang tur hian FIFA hian thutlukna lo siam pawh ni se buaina tur tam tak a awm dawn a ni. Kum 2022 World Cup thleng tur kan zawn khan ram pakhat tan a ni a, tuna ram dang nena inthlen ṭawm tir tum chu a chi loh ang. Thutlukna siam theitu chu FIFA congress chiah a ni bawk," tiin a sawi.

Kum 51 mi UEFA hotupa chuan, "World Cup 2022-a team 48 tel tir tumna hi chu thil theih tak tak niin a lang lo," a ti a, FIFA-in Club World Cup chu club 24-in an khelh theih tura ruahmanna a siam chu thil theih loh a nih thu a sawi bawk.