UEFA Nations League - Engkim a chiang ta

Europe-a football thuneitu sang ber UEFA-in international friendly match chu 'competitive match' awmze nei zawka kalpui a tum avangin UEFA Na­tions League a siam a, a hlawhtling nghal hle.

Ram 55-in September 6 aṭang khan khel ṭanin Nations League group stage match chu khelh zawh a ni ta a, ram paliin 'finals' tia a hming an pek, semifinal tia an koh bawk chu an inpetkai a, a hniam zawkah team engemaw zat an relegate bawk.

Group 28-a ṭhen zingah a sang ber League A-a mahni group ṭheuha hmahruaitute chauh chu finals lut thei an ni a, a bak dang group zawng erawh league sang zawkah promotion an hmu a, group tina a mawngphah chu league hniam lamah an tla thla thung.

Khawiah maw final?

Portugal, England, Switzer­land leh Netherlands-te chu league sang ber League A-a anmahni group ṭheuha hma­hruaitu an nih avangin finals an lut a, June 9-ah finals hi Portugal-ah khelh ṭan a ni ang.

A sang pali

League A-a group pali aṭangin Portugal, England, Swit­zerland leh Netherlands-te chuan finals an lut a, nakkumah UEFA Nations League champion hmasa ber nih an inchuh dawn.

Hetihlai hian kum duhawm lo tak hmangtu Germany leh World Cup finalist Croatia-te chu Iceland leh Poland nen an group-ah a mawngphah ṭheuha an awm avangin league hniam lamah an tla thla thung.

Poland hian Thawhlehni zan khan khualmualah Portugal chu 1-1 in an inhnehtawkpui a, chak pawh ni se League A-ah an in­hamtang thei tawh chuang lo.

Germany hian match li an khelhah chak an nei miah lo a, Iceland leh Poland-in chak an nei bik lo - Croatia-in vawi khat hnehna chang ve mah se vawi hnih an tlawm a, an relegate ta tho.

A sang zingah

Nakkum Nations League-ah chuan Ukraine, Denmark, Bosnia-Herzegovina leh Swe­den te chu League A-ah an awm ve tawh dawn - anni hi League B lama an group ṭheuh­ah hmahruaitu an nih avanga promotion hmu an ni.

Sweden hian Thawhlehni zan khan an group hmahruaitu Russia chu 2-0 in an hneh a, an point hmuh zat in ang mah se an intum tawhna goal difference en a nih avangin Sweden hi an tling daih!

Sweden tan hian Victor Lin­delof leh Marcus Berg te chuan goal hnih ve ve an khung a, Russia lamin a chhanletna tur an neih loh avangin Sweden zawkin League A an khelh phah dawn.

League B aṭang hian group mawngphah luahtu Northern Ireland, Republic of Ireland, Turkey leh Slovakia-te chu Lea­gue C lamah an tla thla thung.

Scotland tan Forrest

Thawhlehni zan Nations League inkhel hmuhnawm takah Scotland tan James Forrest chuan hattrick a siam a, Celtic winger goal khung zarah Israel chu 3-2 in an hneh.

Scotland leh Israel hi an inhmachhawn hma hian point ruk ve ve an nei a, a chak zawk chu League B-a promotion hmu tur an ni - Scotland-in hnehna an chang zui a, Israel an hawihai.

League C aṭang hian Scot­land bakah Finland, Norway leh Serbia-te chu League B-a invawrhkai an ni a, a hniam ber League D lamah Lithuania, Slovenia, Estonia leh Cyprus an tla thla thung.

League D-a a tawp te tan rele­gate-na tur a awm chuang lo a, League C-ah Georgia, Belarus, Macedonia leh Kosovo te an invawrhkai thung a ni.

Khawiah maw finals?

Nations League finals hi Portugal chuan an thleng dawn - Italy leh Poland chuan finals hi thlen dil ve tho mah se semifinal an thlen zawh loh avangin Por­tugal-in an thleng dawn ta a ni.

Portugal, Italy leh Poland-te hian finals hi thlen an dil vek a, mahse finals inpetkai lo tan Nations League champion zawnna hi a thlen theih loh a, Portugal an vanneih phah.

June 5 & 6-ah semifinal khelh a ni ang a, June 9-ah pa­thumna zawnna leh final khelh a ni ang. Semifinal-a inhmachhawn tur erawh a la hriat loh a, December 3-a UEFA inhmuhkhawm hunah engkim a chiang ang.