Jeje-a'n nupui a nei

Mizo footballer zinga thleng sang ber Jeje Lalpekhlua chu nimin khan BCM Model Veng, Hnahthialah Dr Joysie Lalremtluangi nen an innei. Jeje nupui Joysie hi Tuikual South-a cheng a ni a, a pa R. Laldinpuia hi Aizawl FC keeper hlui a ni.

F. Liankima leh Hnunpuii fapa Jeje hian India tan vawi 56 inlan tawhin goal 23 a khung tawh a, Mizo zinga ram tana khel tam ber a ni. Hnahthial tlangval hi India rama club ṭha Pune, Pailan Arrows, Dempo, Mohun Bagan, Chennaiyin leh East Bengal tan a khel tawh a, nomawi ṭhahnem tak a chawi tawh zingah I League, Indian Super League, Federation Cup bakah ram inelna SAFF Cup leh Intercontinental Cup te a tel a ni.