Aizawl FC tan insiamṭhat hun

I League khelh mekah Aizawl FC chuan March 20, Pathianni tlai dar 2:00 hian Indian Arrows an hmachhawn dawn. Mizo club hian match li chhung a zawna an chak loh hnuah an match hnuhnung berah Sudeva Delhi 2-1 in an hneh.

Yan Law hote hian season bul ṭan chhe mah se Sudeva laka point thum an hmuh avangin a chanve chunga lawn theihna hun ṭha an nei. Aizawl FC hian India rama rawlthar ṭha rual awm khawmna Indian Arrows hi an hneh a nih chuan pasarihnaah an awm chho thei dawn.

India hmarchhak aṭanga champion tawh awmchhun AFC hi season ṭantirhah Covid-19 vangin an buai a, hri leng kaite an dam tawh avangin coach Law-a'n player thlan tur a ngah tawh. Hei bakah hian Sudeva an hneh dan avangin an phur bawk. Mizo club hian Delhi club hi injury time-a Lalliansanga (Notea) goal hnih hmangin an hneh.