Man City kalkawngah Atletico, Real leh Chelsea

Nimin khan UEFA hmunpui Nyon, Switzerland-ah Champions League quarterfinal leh semifinal draw neih a ni a, Europe-a inelna sang ber a hmuhnawm dawn.

Champion lai Chelsea chu champion ngun ber Real Madrid nen an inhmachhawn dawn a, Manchester City leh Atletico Madrid inkhela chak zawk nen semifinal an khel ang.

FC Bayern Munich leh Liverpool te an vannei a, team nem zawka ngaih Villarreal leh Benfica te nen pawhfuh an ni. Amaherawhchu Europe-a sulhnu nei ṭha pahnih Bavarians leh Reds te hi semifinal-ah an intawng thei thung.

Inkhelh hun
Champions League quarterfinal first leg hi April 5-6 ah khelh a ni dawn a, second leg hi April 12-13 ah khelh zui a ni ang. Tun season UCL-ah away goal rule a awm lo.

Semifinal hi April 26-27 (first leg) leh May (3-4) ah khelh a ni dawn. Final hi ruahmanna hmasaah chuan St Petersburg, Russia-ah khelh tur a ni a, amaherawhchu Russia-in Ukraine a run avangin Stade de France, Paris-ah sawn a ni.

Kumin nomawi inchuhna hi May 28, Inrinniah khelh a ni dawn.

City hmabak a harsa
Manchester City leh Atletico Madrid te hi UCL-ah an la inkhel ngai lo. Amaherawhchu Pep Guardiola erawhin Diego Simeone hi a hrechiang ang.

Spanish manager Pep hian Bayern a enkawl laiin Ateltico hi semifinal-ah an hmachhawn a, away goal rule hmanga an hneh loh avangin German club final a thlenpui thei lo.

Pep Guardiola hian Barcelona a enkawl laiin UCL nomawi vawi hnih chawi mah se Bayern leh Man City a enkawl hnuah a la champion leh lo. Bavarians a enkawl lai hian ṭum thum semifinal a thlenpui a, Spanish club pathum Atletico, Barcelona leh Real Madrid lakah a tlawm.

Manchester City hian Atletico hi hneh pawh ni se record nei ṭha ber Real Madrid an la hmachhawn thei a, Los Blancos pawh hi chak ta lo pawh ni se nikum final-a an hneh loh Chelsea an hmachhawn dawn avangin final kalkawng ringawt pawh hi a khirh hle.

Engtin zel?
Real Madrid manager hi Carlo Ancelotti a ni a, Italian manager hian a club hlui Chelsea a hmachhawn dawn. Los Blancos hi Lionel Messi telna PSG hnehtu an ni a, La Liga hmahruaitu an nih bawk avangin dah hniam theih an ni lo. Chutihrualin Thomas Tuchel-a enkawl Chelsea hi knockout inelnaah record an nei ṭha hle.

Bayern Munich hi Hansi Flick-a enkawlna hnuaiah Europe-a team ṭha bera chhal theih an ni a, amaherawhchu Julian Nagelsmann hnuaiah khelh ṭhat leh chhiat ṭum an nei. An khelh ṭhat ṭum a nih chuan eng team pawh hneh thei an ni a, season liam ta Europa League champion Villarreal tan hmabak a harsa dawn.

Liverpool hi Jurgen Klopp-a hnuaiah an nghet ṭha a, Benfica aiin an buk a rit zawk. Reds-in semifinal an mitthla ṭan der a rinawm a, amaherawhchu Portuguese club hian tun hnai striker chhuak thar ṭha ber zinga mi Darwin Nunez an kawl tih hriat a ṭha.

UCL Fixtures
Quarterfinal
QF1 Chelsea FC Vs Real Madrid CF
QF2 Manchester City Vs Atletico Madrid
QF3 Villarreal Vs FC Bayern Munich
QF4 SL Benfica Vs Liverpool FC

Semifinal
SF1 Win of QF2 Vs Win of QF1
SF2 Win of QF4 Vs Win of QF3