Pathianni zanah F1 season thar

Car intlansiakna sang ber Formula 1 season thar chu Pathianni zanah an tlan ṭan dawn. Bahrain International Circuit-ah Bahrain Grand Prix an tlan dawn, champion lai Max Verstappen chuan inelna hmachhawn tura a inpeih thu a sawi.

Kuminah hian intlansiak 22 awm tura ruahman a ni, hripui leng vanga tih danglam theih erawh a la ni ang. Red Bull driver Verstappen-a'n nomawi humhim a tum dawn, vawi sarih champion tawh Lewis Hamilton nena an inel a hmuhnawm ang.

Season hmasa khan Abu Dhabi Grand Prix-ah champion a chiang chauh. Intlansiak hnuhnung berah hian sawi zui hlawh takin Verstappen chuan Mercedes driver Hamilton a tlan pel, nomawi a chhuhsak zui nghal bawk.

Dutch tlangval Verstappen hi tun season atana tlanchhinna an neih ṭum pawhin a tlan ṭha ber. British star Lewis-a'n Michael Schumacher-a record kalsana champion hnem ber nih a tumna dal leh thei tura ngaih a ni.

Kum 24 mi Verstappen chuan, "Chona thar kan hmachhawn ṭan leh dawn, kan car a ṭha tawk hle. Thil thar tam tak hmuh tur a awm leh dawn a, inelna a nih rualin nuam ti taka tlan leh ka tum ang," tiin a inringtawk hle.

Red Bull leh Mercedes te hi inel tawk leh ber tura ngaih an ni. Chutihrualin Ferrari pawh ngaihthah an thiang chuang lo. Amaherawhchu, Italian team hian driver an nei ṭha tawk lo deuh a, vawi leh khata hmasawn thut a harsa mai thei.