World number 3 hneh thei Lakshya Sen

All England Championship khelh laiah Lakshya Sen-a'n world number 3 Anders Antonsen hnehin quarterfinal a lut. Indian player langsar dang Kidambi Srikanth, PV Sindhu leh Saina Nehwal te erawh Ningani khan an zinkawng a tawp thung.

World Championship bronze medalist Sen-a hian seeded pathumna Antonsen hi 21-16, 21-18 in a hneh. January thla khan Indian Open nomawi a chawi a, kar hmasa lawk khan German Open-ah final a thleng bawk - a tan season ṭha a ni mek.

India tlangval, kum 20 mi chauh Sen-a'n a match lehpekah chuan Chinese tlangval Lu Guang Zu a hmachhawn leh ang. A thiam pariat chauh an dam tawh avangin a awlsam dawn lo, chutih rualin chak turin theihna a nei.

Mipa singles inkhel dangah Srikanth erawh a chak lo. World number 1 hlui hi Anthony Sinisuka Ginting lakah 21-9, 18-21, 19-21 in a chak lo, inkhel tawk viau mah se darkar khat chuang an inkhelh hnuah Indonesian star a dingchang.

Hmeichhe singles lamah champion beisei ngam zinga mi Sindhu chu a chak lo. World champion hlui hi Sayaka Takahashi nen darkar khat leh minute ruk an inkhelh hnuah 19-21, 21-16, 17-21 in a chak lo.

London Olympic bronze medalist Saina pawh world number 2 Akane Yamaguchi lakah 14-21, 21-17, 17-21 in a chak lo. Tun hnaiah Sindhu leh Saina te hian hlawhtlinna lian an chang hleithei ta meuh lo a ni.