Quarterfinal lut zingah Roma leh Leicester

UEFA Europa Conference League last 16 chu khelh zawh a ni a, team ṭha pariat zingah Jose Mourinho enkawl AS Roma bakah Premier League club Leicester City te an tel. Team dang parukte hi Marseille, Feyenoord, PSV Eindhoven, Slavia Prague, PAOK leh Bodø/Glimt te an ni.

Roma hian quarterfinal lut turin Dutch club Vitesse chu aggregate-ah 2-1 in an hneh. Italian club hian first leg-ah 1-0 in hnehna an chang a, second leg-ah 1-1 in an inhnehtawk.

Stadio Olimpico-ah Dutch club-in Maximilian Wittek hmangin minute 62-naah an khung hmasa a, extra time khel thei dinhmunah an ding. Minute 90-naah Tammy Abraham-a'n goal pawimawh a khung a, Roma-in last 16 an paltlang.

Portuguese manager Jose Mourinho chuan, "Mi ṭhenkhat chuan kan huaisen tawk loah an ngai a, a bik takin Juventus laka kan chak loh danah kan goal kan humhim loh avangin sawiselna kan tawk nasa.

"Amaherawhchu match sarih chhung chak loh an tawng tawh lo. Vitesse lakah khan extra time khelh kan tum lo a, hun tawp thlengin chak tumin kan khel a ni," tiin a naute an hauisen thu a sawi.

Leicester City-in King Power Stadium-ah Rennes 2-0 in an hneh tawh a, Stade de la Route de Lorient-ah harsatna tawk lo tura ngaih an ni. Amaherawhchu French club tan Benjamin Bourigeaud-a'n minute riatnaah a khung a, Foxes dinhmun a ṭha lo.

English club tan Wesley Fofana-a'n minute 51-naah siphurh a sut a, inkhel boruak erawh a ṭang zui hle. Rennes tan Flavien Tait-a'n minute 75-naah a khung a, second leg-ah 2-1 in chak mah se extra time thleng tura an mamawh goal khat dang an khung thei tawh lo.

Nizan khan Conference League quarterfinal inhmachhawn tur pawh a ni a, team inhmachhawn tur kan hre hman lo.

Conference League
Last 16 : 2nd Leg - March 17, Ningani zan
Basel 1 - 2 Marseille
Agg-ah Marseille 4-2 in a chak
Rennes 2 - 1 Leicester City
Agg-ah Leicester City 3-2 in an chak
FC Copenhagen 0 - 4 PSV
Agg-ah PSV 4-0 in an chak
AZ Alkmaar 2 - 2 Bodø / Glimt
Agg-ah Bodø / Glimt 4-3 in an chak
Roma 1 - 1 Vitesse
Agg-ah Roma 2-1 in an chak
Gent 1 - 2 PAOK
Agg-ah PAOK 3-1 in an chak
LASK 4 - 3 Slavia Prague
Agg-ah Slavia Prague 7-5 in an chak
Feyenoord 3 - 1 Partizan
Agg-ah Feyenoord 8-3 in an chak