Maguire hi kan centre back ṭha ber a ni - Southgate

England-in March thla tawp hian Switzerland leh Ivory Coast nen friendly match an khel dawn a, Gareth Southgate chuan Ningani zan khan player 25 awmna squad a puang. Three Lions tana thlan zingah tun hnaia khel ṭha lo Harry Maguire koh tel a ni a, sawi zui a hlawh hle.

Kum 51 mi Southgate chuan, "Harry Maguire hian sawisel ṭhahnem tak a tawk a ni thei a, mahse kan koh lohna chhan tur a awm lo. Harry hi kan centre back ṭha ber zinga mi a ni a, kan tan chuan a khel ṭha reng. Tun dinhmunah John Stones leh Harry aia ṭha kan ramah an awm lo," tiin Manchester United captain chungchang a sawi.

Koh loh langsar
England tana koh loh zingah Manchester United forward Marcus Rashford leh Jadon Sancho te an tel a, Manchester City defender Kyle Walker a tel bawk. Southgate chuan, "Kyle nen kan inbia a, tun ṭum hi kum naupang zawk enchhin nan kan hman tur thu kan hrilh. Amah hi kan tana player pawimawh a ni a, a theihna zawng zawng kan hre bawk. June thlaah chuan team zingah a tel leh ang," tiin Walker chungchang a sawi.

Walker hian ram tan match 65 a khel tawh a, tun ṭumah hian ko lo mah se Man City tana player pawimawh a nih miau avangin kum tawpa khelh tur World Cup-ah a inhliam a nih ngawt loh chuan a tel pha ang.

Manchester United-in result ṭha an nei lo a, Rashford leh Sancho ten an tawrh phah. Southgate chuan, "Jadon hi tun hnaiah hma a sawn a, amaherawhchu a position hi player ṭha kan ngahna hmun a ni. Bukayo Saka, Emile Smith Rowe leh Phil Foden te an awm," tiin a sawi. Rashford erawh khelhna hmun a chan tam tawk loh avangin an ko lo hi a mak lo.

Ralf Rangnick-a naute zingah Maguire bakah Luke Shaw chiah England squad-ah a awm. Hetihlai hian Mikael Arteta kaihhruai Arsenal-in Three Lions tana khel turin player pali Aaron Ramsdale, Ben White, Bukayo Saka leh Emile Smith Rowe te an thawh.

Engtin zel?
England manager Gareth Southgate-a'n Maguire a chhan a, Man United captain hi a khel ṭha lo a nih chuan a dinhmun a him lo. Three Lions tana koh zingah hian Conor Coady, Tyrone Mings leh mi thar Marc Guehi te an awm a, Maguire hian a elpui a nei tih a chiang. Koh loh zingah AC Milan centre back Fikayo Tomori a la awm bawk.

Goalkeeper chungchangah pawh Southgate-a'n ngaihtuahna thar a sen a ṭul. Tuna number one Jordan Pickford hian chet ṭhat loh ṭum a nei a, Arsenal keeper Aaron Ramsdale a chet ṭhat bawk avangin Everton keeper dinhmun hi a chiang lo.

March thla tawpa inkhelh tur hi friendly match ni mah se World Cup khelh tum tan chet ṭhat a ṭul. A bik takin player naupang zawk leh ram tana la khel tam lo Marc Guehi, Reece James, Jude Bellingham leh Conor Gallagher te hoin an hun ṭha neih an hman ṭangkai a ṭul ang.

Squad
Goalkeepers: Nick Pope, Jordan Pickford, Aaron Ramsdale.

Defenders: Trent Alexander-Arnold, Conor Coady, Marc Guehi, Reece James, Harry Maguire, Tyrone Mings, Luke Shaw, John Stones, Ben White.

Midfielders: Jude Bellingham, Conor Gallagher, Jordan Henderson, Mason Mount, Declan Rice, James Ward-Prowse.

Forwards: Tammy Abraham, Phil Foden, Jack Grealish, Harry Kane, Bukayo Saka, Emile Smith Rowe, Raheem Sterling.