Barcelona leh West Ham an tlang

Goal an phurh hmasak hnuah Barcelona an tho chhuak, an mikhualna ramah Galatasaray 2-1 a hnehin Europa League quarterfinal an lut. Pedri-a'n si phurh a sut hnuah Pierre-Emerick Aubameyang chuan chakna goal a khung.

Inkhel dangah West Ham chuan Sevilla 2-0 in an hneh, inkhel hmasa nena belhkhawmin Premier League club hi 2-1 in an tlang. Extra time-ah Andriy Yarmolenko chuan chakna goal pawimawh hi a khung a ni.

Barca an chak
Nou Camp-a an inkhelh ṭumin goal a lut lo. Istanbul khawpuiah erawh goal kan hmu har lo, mualneitu Galatasaray tan Brazilian defender Marcao chuan minute 28-naah corner aṭanga ball kal a tauh lut - Xavi naute an hawihai hle.

Rawlthar duhawm Pedri erawh a buai ve lo. Spanish midfielder hian box chhunga player pahnih a bum tluk hnuin si phurh a sut, a goal khung hi a 'cool' raih raih hle a, a bul velah player dang tam mah se a chiai eih lo - kum 19 mi chauh a la ni tih hria ila.

Catalan club hian season bul an ṭan fuh lo a, Champions League group stage an paltlang zawh loh avangin kum 2004 hnua a vawi khat nan Europa League hi an khel. Turkey ramah pawh hian mualpho leh thei dinhmunah an ding hman a, an kalkawng a awlsam vek lo.

Second half-ah Xavi nauten na takin an nawr a, striker Aubameyang chuan Frenkie de Jong ball siamsak chu hnai tak aṭangin chakna goal atan a khung. Kum 32 mi Auba hian Barca tana a match hnuhnung pasarihah goal sarih a khung.

Xavi chuan, "Mikhual tana inkhelh harsatna hmunah hnehna kan chang, a awmzia chu kan khel ṭha tihna a ni," a ti. A naute khelh danah a lawm a, a bik takin rawlthar Pedri season hman danin a tilawm zual, hmabak êng tak a nei tih a sawi nawn bawk.

A tawpah Hammers
Europa League a nih tawh chuan Sevilla nen a inzawm tlat. Spanish club hian tun hnai season riat chhungin Europa League nomawi vawi li ngawt an chawi thei, first leg-ah 1-0 a hma an hruai tawh bawk avangin an tlang rinna a lian hman.

Mahse, David Moyes enkawl West Ham United chuan tum dang an lo nei. London khawpuia inkhelah Tomas Soucek chuan Michail Antonio siamsak hmangin goal a khung a, inkhel hmasa nen belhkhawmin 1-1 chiah a ni.

Minute 90 chhungin goal dang a lut zui lo, extra time khelh a ngai. Minute 112-naah Yarmolenko-a'n chakna goal a khung. Pablo Fornals-a shot chu keeper Bono-a'n lo dansak mah se Ukraine international striker hian ball per a khung, keeper tan dan nawn theih a ni tawh lo.

La Liga club Sevilla lamin thapui thawhin bei let mah se goal an sual chuak zo tawh lo. Kum 1981 hnua a vawi khat nan Hammers hian European football-ah quarterfinal an khel leh dawn, mumang ramah an cheng mek.

Lawmna mittui
Ukraine buainain infiamna khawvel pawh a chiah hneh a, chakna goal khungtu Yarmolenko hi Ukraine mi a nih avangin lawmpuitu a ngah. London Stadium-a inkhel entute thawm a ring a, lawm avangin mi tam tak biangah mittui a luang.

Hamrik hnuhnung a rik hnuah kum 32 mi Yarmolenko hi fans zingah a kal a, an ram puanzar la chhuakin Ukraine a thlawpna a tilang. Kartawp Premier League-a goal a khung pawhin mittui nen a lo lawm tawh bawk, a rilruah an ram a lian hle.

David Moyes chuan, "Kan tum ram panin kan kal zel a, a sang thei ang ber thlen tumin theihtawp kan chhuah zel ang. Hringnunah hian thil hrang hrang a thlen chang a awm, tunlai boruak nena ngaihtuah chuan Yarmolenko dinhmun tur pawh kan hriatthiampui," a ti

West Ham striker Antonio pawhin a hlim thu sawiin, "Tun season kan hman dan chu duhthusam a thleng dik a ni ber mai," tiin Europa League quarterfinal luh chu nuam a ti hle, a teammate Yarmolenko an thlawp tlat thu a sawi ve bawk.

UEFA Europa League
Last 16 Second Leg Results
Red Star Belgrade 2 - 1 Rangers
RED: Mirko Ivanovic 10'; El Fardou Mohamed Ben Nabouhane 90+3' (P)
RAN: Ryan Kent 56'
(Aggregate-ah Rangers hi 4-2 in an chak)
AS Monaco 1 - 1 Sporting Braga
MON: Axel Disasi 90'
BRA: Abel Ruiz 19'
(Aggregate-ah Braga 3-1 in an chak)
Bayer Leverkusen 0 - 1 Atalanta
ATA: Jeremie Boga 90+1'
(Aggregate-ah Atalanta hi 4-2 in an chak)
Galatasaray 1 - 2 Barcelona
GAL: Marcos do Nascimento Teixeira 28'
BAR: Pedri 37'; Pierre-Emireck Aubameyang 49'
(Aggregate-ah Barcelona 2-1 in an chak)
Lyon 1 - 1 Porto
LYO: Moussa Dembele 13'
POR: Pepe 27'
(Aggregate-ah Lyon 2-1 in an chak)
Eintracht Frankfurt 1 - 1 Real Betis
EIN: Guido Rodriguez 120+1' (OG)
REA: Borja Iglesias 90'
(Aggregate-ah Eintracht Frankfurt 3-2 in an chak)
West Ham United E 2 - 0 Sevilla
WHU: Thomas Soucek 39'; Andriy Yarmolenko 112''
(Aggregate-ah West Ham 2-1 in an chak)
Spartak Moscow CANC RB Leipzig
(UEFA-in Spartak Moscow inkhelh an phal lo)