Everton an vannei

Frank Lampard-a enkawl Everton chuan player 10-a khel chungin Ningani zan khan Newcastle United 1-0 in an hneh. Goodison Park-a inkhelah hian Alex Iwobi-a'n minute 99-naah chakna goal a khung.

Toffees hi kuminah vawi khat chauh la chak an nih laiin Magpies hi kumina vawi khat chauh la chak lo an ni a, Goodison Park-a inkhel ni mah se mikhual buk a rit zawk.

Minute 83-naah Everton midfielder Allan chuan Newcastle substitute Allan Saint-Maximin a tlawh thluk avangin red card a hmu. Referee Craig Pawson-a'n mual sira monitor a rawn bakah Toffees-in a thutlukna an sawisel rei avangin minute 14 zet hun an pek belh.

Lampard-a hote tana ṭha ber chu point khatah a ngaih theih a, amaherawhchu an duhthusam point thum an hlawh chhuak ta zawk. Injury time-ah Alex Iwobi leh substitute Dominic Calvert-Lewin te an inthlawp ṭha a, Arsenal winger hlui hian cool zetin goal pawimawh a khung. Goodison Park-a inkhel entute thawm a ring hle.

Everton hi 17-naah la awm chhunzawm mah se point 25 an hmu a, an chung leh hnuaia awm aiin match hniha an khelh tlem avangin thawk lakna hun an nei. Inkhelh banah Lampard chuan a naute a fak a, chutihrualin match thum khel thei lo tur Allan chungchang chu ngaihtuah nawn se a tih thu a sawi bawk.