El Clasico: Tu nge ropui zawk dawn?

Cristiano Ronaldo a awm tawh lo a, Lionel Messi meuh pawh a awm tawh lo - mahse, Real Madrid leh Barcelona inhuatna erawh a la ngai reng a, an inkhel turin ngaihven a la hlawh reng.

Pathianni zan dar 1:30-ah La Liga-a Real hmachhawn turin Barcelona an lenglut dawn a, team pahnih tum erawh a inthlau ta deuh. Real-in champion an tum a, Barca-in Champions League khelh phak an tum thung.

Real-in La Liga-ah point 66 hmuin hma an hruai mek a, an hnuai chiaha awm Sevilla aiin point sawmin an sang fal. Barca-in point 51 hmuin pathumna an ni mek a, palina Atletico Madrid nen an point hmuh zat a inang.

Barca-in Champions League khelh phak an tumna kawngah chak an mamawh a, Real champion kawng tih harsat an châk hrim hrim dawn bawk. Real tan Champions League khel phak loa Barca awm lai tluka hmuh nuam a awm dawn lo - team pahnih intawn hmasakah 2-1 in Real an chak.

Benzema tel lohna
Real-in buaina pakhat an nei a, an thiampuipa Karim Benzema chu hliam vangin a inlan thei lo mai thei - he thu buatsaih lai hian French striker dinhmun a la chiang lo a, a inlan loh chuan Real tan buaina a tling ang.

Benzema hian tun season inelna hrang hrangah match 34 khelin goal 32 a khung tawh a, assist vawi 13 a nei bawk. A tel lo chuan Real tlarhma a hriam lo sawt dawn tihna a ni a, Barca an thaw huai ang.

Chutihrual chuan Real hian season duhawm tak hmangtu Vinícius Júnior an kawl tho, kum 21 mi forward hian tun season-ah match 38-ah goal 17 khungin assist vawi 14 a nei tawh.

Real hian midfield-ah Luka Modric, Casemiro leh Toni Kroos an la nei bawk a, anni pathum an din ho leh theih phawt chuan Barca tan buaina thlen turin an ṭha tawk.

Three P's
Barca-in coach atana Xavi an neih hnuah hmasawnna a takin hmuh tur a awm a, a bik takin Three P's tia an sawi ṭhin possession, positioning leh pressing ah hmasawnna hmuh tur a awm.

Spanish midfielder hlui hnuaiah an goal press a na sawt a, awmze neia ball inpek kual hmuh tur a tam leh ṭan a, player tinin an awmna tur an chiang em em vek bawk - an inkhel a hmuhnawm tih loh rual a ni lo.

December 4-a Real Betis laka an tlawm hnu khan Barca hi an tlawm leh tawh miah lo a, league match 12-ah vawi li draw neiin, vawi riat an chak a, league match hnuhnung paliah goal 14 ngawt an khung a, goal hnih chiah an chhuah!

Barca tlarhmain hma an sawn tluk zetin tlarhnung lam pawh an khawng ṭha tih a lang a, midfield-ah captain Sergio Busquets a hmuhnawm leh ta viau bawk. "Barca tan Spain-a a khelh angin a khel thei tawh lo," tia an sawi midfielder hi Xavi hnuaiah a vul leh ta.

Beiseina thar
Barca tan Xavi awm a lang a, chutihrual chuan thlasik transfer-a an lakluh Ferran Torres, Pierre-Emerick Aubameyang leh Adama Traore te hian danglamna an ken tel vang a ni bawk.

Kum 22 mi Torres hian Barca a pan hnuah match 13 aṭangin goal nga a khung a, assist vawi li a nei bawk - Auba hian Barca tan match 10-ah goal sarih a khung a, Traoré hian match kuaah vawi li assist a nei tawh.

Barca hian tun season-a an league match hmasa 21-ah goal 32 chiah an khung a, match hnuhnung parukah goal 20 ngawt an khung ta thung.

Chutihrual chuan Real hian si ban nghak turin Thibaut Courtois an nei a, league match 28-ah goal 21 chiah a la chhuah a, vawi 12 clean sheet a nei thei. Belgian keeper venpui turin David Alaba leh Eder Militao an nei a, Dani Carvajal leh Ferland Mendy inhliam erawh a pawi mai thei.