Chelsea hian ka mamawh a nei - Tuchel

Tun hnaia club talbuai tak Chelsea boss Thomas Tuchel chuan Manchester United nena sawizawm a ni chu a pha a, German coach chuan, "He club tan hian ka inpe tawk loah inngai em ni? A ni thei lo ang. Chelsea tana hnathawh hi nuam ka ti a, he club hian ka hlimna turin engkim a nei a ni," a ti.

UK sorkarin club neitu Roman Abramovich a hrek avanga buai mek Chelsea hian zanin dar 10:45-ah FA Cup quarterfinal an khel dawn a, Middlesbrough an lenchilh ang.

Blues tan Champions League-a Lille an hneh loh ṭuma inhliam Reece James leh Callum Hudson-Odoi ten training zawm leh tawh mah se an inlan theih dawn leh dawn loh a chiang lo a, Andreas Christensen dinhmun a chiang lo a, Saul Niguez (Covid-19) leh Ben Chilwell (khup) chu inlan lo tur chiang an ni.

Pathianni zanah FA Cup quarterfinal khelh chhunzawm a ni dawn a, zan dar 6:00-ah team intiat tawk Crystal Palace leh Everton inhmachhawnin, zan dar 8:30-ah Southampton-in Manchester City an mikhual ang a, zan dar 11:30-ah Liverpool-in Nottingham Forest an lenchilh dawn bawk.

March 19, Inrinni Zan
Middlesbrough 10:45 PM Chelsea

March 20, Pathianni Zan
Crystal Palace 6:00 PM Everton
Southampton 8:30 PM Manchester City
Nottingham Forest 11:30 PM Liverpool