Gerrard-a mikhual tur Arsenal

Arsenal chuan zanin dar 6:00 hian Villa Park-ah, Steven Gerrard-a enkawl Aston Villa an hmachhawn dawn. Premier League aṭanga Champions League khelh phak tum Gunners tan chetsual nawn a remchang lo ang.

Palina inchuh zingah Tottenham Hotspur sawibo a rem bik lo. Antonio Conte naute hian Pathianni zanah West Ham nen London Derby an khel dawn, an chak a nih chuan Spurs hian Hammers leh Manchester United an lehpel thei dawn.

Beiseina nung
Mikel Arteta nauten beiseina an neih san lai, an boruak ṭhat vanglai ni bawkin Liverpool an hmachhawn a, anmahni mualah ngei 2-0 in an mualpho. Inkhelh banah Arteta chuan Villa hmachhawn tura an inpeih hman a beisei thu a sawi nghal.

Arteta chuan, "Chiang taka ka sawi ngam chu ka naute an inpeih hman ang. Ei leh in an ti ṭha ang a, an mu ṭha bawk ang. Chutih rualin inhnaih chilh taka fixture siamtu Premier League chuangah ka lawm," tiin an fixture chu inhnaih a tih thu ti el takin a sawi.

Reds laka an khelh dan thlirin North London club hi an la puitling vek lo tih a hriat, a bik takin tlarhma lamin goal khung an harsat deuh. Villa Park-ah Alexandre Lacazette leh a nauten fiahna an hmachhawn dawn a, goal khung ngei an tum tawh ang.

Gerrard a fimkhur
Rangers tana hna ropui a thawh hnuah Steven Gerrard-a'n Villa a dinthar leh mek a, an khelh hmabak pawh ngun takin a zir lawk ṭhin. Liverpool leh Arsenal inkhel pawh kha ngun takin a lo en, an khingpui tur khelh dan phung a lo zir chiang.

Gerrard chuan, "Arsenal khelh dan, inkhelh lai leh inkhelh hnua an chet vel dan te, manager leh player-te ṭawng dante kha a puitling ka ti hle. Chak lo mah se an khel chhe lo," a ti a, thiam takin an mikhual tur a fak - an ṭhat tawk lohna lai erawh a rilruah a vawng reng dawn.

English manager hian Barcelona aṭanga a hawh Philippe Coutinho a hmangthiam hle a, Brazil international forward hi Gunners tlarhnung tana ven ngun ngai bik tur a ni. Goal khung a thiam a, ṭhiante a siamsak thiam bawk avangin ven sen a har mai thei.

Conte a inpeih
Antonio Conte-a'n Tottenham a enkawl hnuin a ngaihdan a thlak fo. Premier League-ah palina nih phak an tum a, a hnuah an tan nih phak ngaihna a awm loh thu a sawi. Tun hnaiah erawh tum mumal tak an neih thu a sawi, chu chu palina nih phak a ni.

Conte chuan, "Match zawng zawngah theihtawp kan chhuah a ngai tawh. A bik takin West Ham nen kan inkhelh tur hi a pawimawh, a chhan chu UCL ticket neih tuma kan elpui an ni. Europa League an khel phak a, an chhe lo tih a chiang, point thum kan hmuh chuan a lawmawm ang," a ti.

David Moyes enkawlna hnuaiah West Ham-in season duhawm an hmang mek. Europa League quarterfinal an lut tawh a, an khingpui tur Spurs aiin inkhel hah deuh mah se an boruak ṭhat lai a ni a, an elpui club lakah chak tumin thapui an thawh ngam ang.