Man City hmaah Grealish

Manchester City chuan Pathianni zan dar 10:00 hian Aston Villa hmachhawn turin Villa Park an tlawh ang. Pep Guardiola hote tan Premier League nomawi humhim turin chetsual a thiang tawh lo a, chutihrualin an khingpui Villa hi kaithar ni mah se League Cup semifinal-a Leicester City chelh theitu an ni.

King Power Stadium-a Villa leh Leicester City te 1-1 an inhnehtawk ṭumin Jack Grealish chu player hmuhnawm a ni a, Villa captain hi Man City buaina siam thei a ni ang. Tun season Premier League-ah central midfielder 62 velin minute 1,000 chuang an nei tawh a, chung zingah chuan Grealish a ball khalh 90% a hlawhtlinpui thei a. Hemi kawngah hian Bernardo Silva, Kevin De Bruyne, James Maddison leh Mateo Kovacic te chungah a awm.

Man City-in an khingpuite pressure an pe ṭha ṭhin a, Grealish hi chuhtu an awm vanga a buai meuh lo - hei tak hi en châkawm chu a ni. Pep Guardiola-a'n kum 24 mi midfielder Grealish hi dah ṭhat a tum dawn a, team pahnih hi League Cup final-ah an inhmachhawn theih avangin tun ṭum an inkhel hi a pawimawh tel thei bawk.