Beiseina nung neitu Arsenal

An tum a, an beisei bawk - Arsenal chuan Champions League khelh an tumna an chhawm nung zel. Mikel Arteta naute hian Bukayo Saka goal khat hmangin Aston Villa 1-0 in an hneh.

Gunners hian point 54 hmuin Premier League table-ah palina dinhmun an luah chhunzawm a, khelh zat inangah pathumna Chelsea an phak lohna chu point nga a ni. Pangana Manchester United aiin point liin an sang thung, match khatin an la khel tlem bawk.

Laipui a puak
Villa Park hi mikhual tana inkhelh awlsamna a ni ngai lem lo. Steven Gerrard awm hnuah phei chuan hmun ralṭi a ni. Liverpool laka chesual hlim Arsenal tan pawh chetsual nawn theihna tur a ni a, a tir aṭangin an fimkhur hle.

Mual sira awm Saka chu Gunners goal nawrna hmanrua a ni a, hliam Lucas Digne aia lut kum 36 mi Ashley Young tan Saka hi dan a harsa. England international hian goal a khung bakah, chawlhlawk hmain hun ṭha vawi hnih a siam hman.

Saka-a'n amah ang bawka Hale End chhuak Emile Smith Rowe tan a siamsak a, mahse Smith Rowe hian goal bar chungah a pet chhuak. A cross hlauhawm tak pakhat pawh Ezri Konsa-a'n anmahni lamah a dang lut teuh hle, keeper Emiliano Martinez-a'n a dang hman hram.

Kum 20 mi Saka dan reng theih a ni lo, mual sirah defender Cedric Soares nen ball an inpek hnuin Portugal international hian a cross. Villa player lamin an tauh chhuak thei mai lo, box hmaa ding Saka chuan laklawh nei loin a pet lut.

Villa an chuai
Gerrard-a'n din thar viau mah se Villa hian team lian hmachhawn an harsat rih hle. Arsenal lakah first half chhungin goal hlauhawm an siam thei lo a ni satliah lo, shot pawh an nei miah lo, anmahni goal an la venghim thei lo zui.

Second half-ah erawh an game a kang hret. Ollie Watkins-a'n goal ban a tih per a, bench aṭanga lut Danny Ings hmangin ball kangah vanneihna zawng mah se, a ball tauh te chu goal zawnah a kal thei lo, bar pawn lamah an liam zel.

Hun tawp dawnah Nicolas Pepe-a'n ṭul lo takin freekick a chawi. Philippe Coutinho-a pet thiam tawkna lai vel a ni, Brazilian midfielder hian ṭha zetin pet mah se keeper Bernd Leno a chesual duh lo, hlauhawm taka ball kal hi a lo dansak.

Tun dinhmuna a sang zual pariat an hmachhawnah Villa hi vawi kua ngawt an tlawm, team lian hmachhawn an harsat tih a chiang. Chutihrualin Gerrard an rawih tirh khan table-ah 16-na an ni. Tunah chuan pakuana an ni a, a sang zual 10 zinga tel chu season ṭha a ni ang.

Manager thukhawchang
Arsenal manager Mikel Arteta chuan, "Ka naute khelh danah ka lawm, an inkhel chauh ni loin mual chhunga an awm dan thlir khan lung an tiawi hle. Team ṭha ni tur chuan ngelnghet taka khelh ṭhat a ngai, chumi chu kan ti mek.

"Palina nih phak kan duh takzet a, nih phak ngei pawh tumin kan bei," a ti. North London club hi an match hnuhnung pasarih zinga parukah an chak, season bul ṭan chhe viau mah se tun hnaia an result vangin an invawrh.

Aston Villa manager Gerrard chuan, "A bik takin first half kha a harsa hle, a chhan chu kan khelh chhiat vang a ni. Kan tum leh duh angin kan ti thei tlat lo, chawlhlawk hma hnuah erawh hma kan sawn ve deuh.

"Arsenal te nen hian kan inhlat vak loah ka ngai, mahse inthlauhna kan nei. Kan inkar tizim turin kan bei chhunzawm ang," a ti. Premier League-ah 10-na an nih phak chuan tun hnai kum 11 chhunga a vawi khatna tur a ni ang.