Ukraine naupang tan Federer

Roger Federer chuan indona in a nghawng Ukraine naupangte tan £379,223 (Rs. 3,79,62,195) a thawh tur thu a sawi. Russia leh Ukraine buaina vang hian naupang tam tak chuan ei tur an nei mumal lo a, lehkha an zir thei lo bawk.

Grand Slam vawi 20 champion tawh Federer chuan, "Ukraine rama thil thleng chu kan lo hmu ve a, kei leh ka chhungte min nghawng na hle. Keini chuan remna leh muanna awm thei se tih hi kan duhthusam a ni reng.

"Tun dinhmunah hian Ukranian naupang maktaduai ruk chuangin lehkha an zir thei lo mek a, tam tak chuan ei leh in tur ṭha an nei lo bawk. Hun harsa leh hrehawm tak an tawrh lai hian ṭanpui kan duh a ni," tiin a sawi.

Infiammi, mimal leh club tam takin ṭanpuina hi an lo pe tawh. Tun hnai khan Real Madrid chuan £844,980 (Rs. 8,45,86,894) an thawh a, ral tlante tan Juventus pawh an che chhuak. Middlesbrough, Rangers, Celtic leh Everton bakah club dang pawhin tha an thawh a ni.