Aizawl FC an chak zawn

Aizawl FC-in match hmasa palia chak an neih loh hnuin hartharhna an chang a, match zawnin hnehna an chang. Mizo club hian Sudeva Delhi an hneh hnuah nimin tlai khan Indian Arrows 2-0 in an hneh.

Mohun Bagan Ground-a inkhelah Aser Pierrick Dipanda Dicka a langsar a, Cameroonian striker hian Aizawl FC goal hnih a khung a, Indian Arrows-in a chhanletna an nei lo.

AFC leh Arrows ten inkhel nung tak an lantir a, goal erawh hmuh tur a awm mai lo. Minute 42-naah Serchhip tlangval thawkrim Vanlalnghenga'n vei lam aṭangin ṭha zetin ball a vawrhlut a, Dicka-a'n cool zetin goal hmahruai a khung.

Second half-ah Aizawl FC-in bul an ṭan ṭha a, Lengpui tlangval F. Lalremsanga chuan Arrows defender inkarah ball fing a pe lut a, Dicka-a'n ṭha zeta lalutin minute 49-naah goal ṭha a khung.

Cameroonian striker Dicka a hmuhnawm zui a, hattrick siamna hun ṭha nei mah se goal dang a khung tawh lo. Sudeva laka goal hnih khungtu Lalliansanga chu hun tawp dawnah a rawn lut a, goal a rawn keng tawh bik lo.

Aizawl FC hian hnehna an chan avangin point ruk an hmu a, pariatnaah inhlang chho mah se inkhel dang result a zirin an dinhmun a danglam leh thei dawn. Mizo club hian March 24, Ningani zan hian Churchill Brothers an hmachhawn leh ang.

March 20, Pathianni
Indian Arrows 0 - 2 Aizawl FC
AFC : Aser Pierrick Dipanda Dicka 43', 49'

Vawiin Inkhel Tur
Rajasthan FC 2:00 PM Churchill Brothers
Trau 4:30 PM Gokulam Kerala
Mohammedan SC 7:30 PM Kenkre