Legrand Cup - Vawiin aṭangin Last 16

Legrand Cup, MFA Futsal 2021-22 Season Opening Tournament chu ni ruk chhungin group stage khelh zawh a ni a, vawiin aṭangin Division One club-ten KK Futsal Ground-ah last 16 an khel ang.

League Club aṭangin Chhinga Veng FC, Thyristor FC (Ramhlun Venglai), Saron Veng FC leh Team Gideon (Kanan) ten semifinal an lut tawh a, March 24, Ningani hian final khel tur an zawng ang.

Division One hnuaia club 62 aṭangin club 16 - Armed Veng South FC, Cheat Day FC (Republic Veng), FC Ramhlun North, Goshen FC (Sihphir Venghlun), HP FC (Rangvamual), JK FC (Zuangtui), M & B FC (Zuangtui), MTC FC (ITI Veng), Muthi FC, NSC Samu Hmar FC (Nursery), The Gangs Club (Zotlang), Thlangtiang FC, Tlangnuam FC, Tuikhuahtlang FC, Tuikual North FC leh Zarkawt Mustangs ten last 16 an lut.

MFA hnuaiah hian League Club (16) leh Division One (62) an awm. Season opening tournament-ah hian League Club 62 te hi group 16-ah ṭhen an ni a, group winner ṭheuhin knockout stage an lut.

Last 16 lut zingah Thlangtiang FC chuan match thum aṭangin goal 29 an khung a, goal khung tam ber an ni. Republic Veng club Cheat Day Futsal Club-in goal khat chiah an chhuah a, goal chhuah tlem ber an ni thung.

League club hi inelna sang zawk an ni a, team 16 chauh an awm. Group A aṭangin Chhinga Vegnin an khingpui Bungkawn FC, Zonuam FC leh Bawngkawn FC te hneh vekin semifinal an lut.

Group B pakhatna Ramhlun Venglai club Thyristor FC pawh an khingpui Electric Veng FC, FC Khatla leh Whetstone FC (Ramthar Veng) te an hneh vek bawk.

Group C aṭangin Saron Veng FC-in point sarih an hmu a, Lawmna FC (Dinthar) nen inhnehtawk mah se LM Futsal Club (Durtlang) leh Ramhlun South FC te an hneh ve ve.

Group D-ah Kanan club Team Gideon chu pakhatna an ni a, an hnuaiah hian AIFF hnuaia ram pum huap futsal inelna hmasa bera Mizoram aiawhtu Chanmari Zothan Futsal bakah Zaia Memorial FC (Laipuitlang) leh IDBI Capital FC (Thakthing Veng) te an awm a ni.

Inelna hi Eastern Electricals-in an sponsor a, official partners-ah Mizoram Youth Commission leh MiSDA-te niin, co sponsors hi Aizawl Bakers Stop (Dawrpui) leh VL Machinery Tools (Dawrpui, Jail Veng) an awm bawk a ni.