FA Cup semifinal khel tur Chelsea

Khelmual pawnah buainain Chelsea a hual vel a, khelmual chhungah erawh an buai lo - Inrinni zan khan FA Cup quarterfinal-ah Middlesbrough chu 2-0 in an hneh a, semifinal an lut.

Blues tan sawisel hlawh Romelu Lukaku-a'n goal a la khung thei reng tih pholangin goal hmahruai a khung a, Hakim Ziyech chuan goal khat a khung ve bawk.

Championship club Middlesbrough hian a thiam pariat zinga tel turin Manchester United leh Tottenham Hotspur an pet chhuak a, Chelsea meuh an tawn chuan an ṭang zo lo.

Boruak a hot
Tun hnaia ticket hralh thei lo tura hrem tawk Chelsea-in Boro khelmualah an khel dawn tih an inhria a, hei vang hian Boro fans chauh hmachhawn ai chuan inkhel entu awm loa inkhelh FA lamah an dil!

Blues dilnain Boro thin a khei zak a, club chairman Steve Gibson phei chuan, "Chelsea leh infiamna khawvela zahawmna hi thu tlar khata sawi zawm chi a ni lo," a ti hial a, Chelsea chet dan a dem hle.

Chelsea chet dan avangin Boro fans thin a rim a, London club hi khelmualah zirtirna pek an duh. Chutihrual chuan Blues-in Boro Chairman ṭawngkam an la na a, Championship club hi petchhuah ngei an duh ve bawk.

A goal hma
Blues hian FA-a an dilna an hnukdawk a, ticket 4,500 an neih chu an hralh theih loh avangin UK sorkarin Roman Abramovich a hrek hmaa ticket lei hman mi 700 chiahin Boro khelmualah an ṭawiawm thei.

Mahse, Blues hian an fans tlemte hlimna thlen turin hun an duh rei lo. Minute 15-na lekah Mason Mount-a cross aṭanga ball kal chu Lukaku-a'n a khung a, Riverside Stadium-a fans 30,000 chuang an ngawi.

Chelsea-in an duhtawk mai lo. Minute 31-naah Ziyech chuan a khung ve leh a, London club vanneih zan ni se hei aia tam zawk khung thei an ni - mahse, an tum ram an thleng a, an lungawi ang.

Inkhel hmuhnawm
Chelsea tan Lukaku-a'n goal khung theihna chance dang a nei a, mahse, Belgian striker khung ngei tura lang chu Boro right back Anfernee Dijksteel chuan goal line aṭangin a lo pet chhuak hman.

Bench aṭanga luhtir Timo Werner pawhin hming chherna remchang a nei a, mahse, freekick aṭanga a ball hmuh hmanga German striker hun neih hi Middlesbrough goalkeeper Joe Lumley chuan a lo dansak.

Boro pawh chance nei lo an ni bik lo - mahse, Arsenal aṭanga loan-a an hawh Folarin Balogun leh Duncan Watmore ten an chance neih duhawm chu an chhawr thei lo.

March 19, Inrinni Zan
Middlesbrough 0 - 2 Chelsea
CHE: Romelu Lukaku 15'; Hakim Ziyech 31'
March 20, Pathianni Zan (Result kan hre hman lo)
Crystal Palace 6:00 PM Everton
Southampton 8:30 PM Manchester City
Nottingham Forest 11:30 PM Liverpool