Hliam vanga buai Liverpool mualah Foxes

Tun hnaia Liverpool titi luahtu ber chu player inhliam chanchin a ni a, hetiang boruak karah hian international break-in Reds tan chanchinṭha a thlen lo. 

Egypt tana a fehchhuahna lamah Mohamed Salah chuan Covid-19 a kai a, tun season-a goal 10 khung tawh forward tel loin Reds hian Pathianni zan dar 12:45-ah Leicester City an mikhual a ṭul dawn. 

Foxes-in Reds hmachhawn hun atan duh thlang thei ni se, tun ang hun tluka thlan tur a awm chuang lo - Liverpool damdawi in lun lai ber a ni. 

Liverpool boss Jurgen Klopp chuan, "Foxes hi team ṭha tak an ni a, chu chu season hmasa khan an pholang tawh. Hliam an neih lai pawhin an insiamrem thei a, inelna an telnaah chuan nomawi chawi beisei thei vek an ni," a ti a, an khingpui tur a fak.

Liverpool player zingah Virgil van Dijk leh Joe Gomez chu season tluan deuhthawa inlan lo tur chiang an ni a, anni pahnih inlan thei lo tur ringawt pawh hi Reds tan chhiatpui tham a ni. 

Merseyside club-in Salah an chhawr thei loh thu an hre zui a, nizana media-a hmachhawnnaah Klopp chuan captain Jordan Henderson leh Trent Alexander-Arnold inlan theih loh tur thu a sawi chiang zui. 

Klopp chuan, "Hendo leh Trent an inlan thei dawn lo tih a chiang," a ti a, hetihrual hian Thiago Alcantara, Fabinho leh Alex Oxlade-Chamberlain-ten dam lam an pan thu a sawi thung. 

German coach chuan, "Thiago, Fabinho leh Ox dinhmun a ṭha a, Foxes hmachhawn tura sawi chian theih erawh a la ni lo," a ti - Fabinho hi a dam a nih chuan tlarhnung laiah Joel Matip nen an inkawp thei ang a, Thiago a awm chuan Hendo a ngaihawm lo sawt bawk ang. 

Liverpool hliam ngah chhan lian tak chu international break a ni a, Gomez leh Hendo hi ram tan an fehchhuahna lama inhliam an ni a, Salah-a'n Covid-19 a kai chhan hi a unaupa nupui neihna a chhim piah lamah ram tana a fehchhuah vang a ni tel bawk. 

Klopp chuan, "Kuminah international break-a awm tawh dawn loh avangin ka lawm a, chutihrual chuan international break vang hian tumah dem theih an ni lo. UEFA pawhin Euro a sawn a ngai hial a, an buai ve hle a ni," a ti a, tumah a dem duh lo.

German coach hian tun season-ah 4-2-3-1 a hman chang a awm a, mahse Salah a awm tak lohah chuan tun season-a goal sarih khung tawh Diogo Jota, Roberto Firmino leh Sadio Mane inkawp tirin 4-3-3 a hman a rinawm. 

Klopp chuan, "Inhliam vanga kan buai loh season-a la awm ngai lo a, mahni inkhawngaih emaw hrehawm tihna tur a awm lo. Ni e, kan hriat tirh chuan rilru chu a buai ṭhin ngei a, a hnuah erawh a chinfelna lam kan buaipui ṭhin," a ti.

Foxes-in hliam vangin buaina an tawk ve tho a, tlarhnung laiah Caglar Soyuncu an chhawr thei dawn lo chiang a, he thu buatsaih thleng hian right back Timothy Castagne leh defensive midfielder Wilfred Ndidi dinhmun a chiang lo bawk. 

Mahse, Foxes fan-te lawmna turin Castagne leh Ndidi-te training lai hmuh turin media lamah a awm leh tawh thung - anni pahnih hi an inlan thei a nih chuan tlarhnung an ngaihtuahawm lo sawt ang. 

Foxes player zinga en bik hlawh leh tur erawh Jamie Vardy a ni a, English striker hian tun season inelna hrang hrangah match riat khelin goal kua a khung a, assist vawi khat a nei tawh bawk. 

First choice defender pathum tel loa khel tur Liverpool tlarhnung tan Vardy ven hi hna hautak a tling dawn a, ani thlawp tura Harvey Barnes, James Maddison leh Dennis Praet an awm bawk avangin a awlsam lo ang. 

Premier League champion lai an ni a, hliam ngah mah se Liverpool an hnual phah lo - hei hi Klopp-a sawi a ni a, German coach hnuaia Reds rilru puthmang thlirin dawt a sawi a rinawm loh. 

Klopp chuan, "Ka player-te hian an ṭha tawk a ni tih pholang turin tih leh chuan tur an nei tawh bik lo. Hun harsaah kan talbuai ngai lo a, kan neih zawng zawng nen kan bei mai ṭhin. 

"Kan buaina a lian a nih chuan kan thawhhona a ṭha lehzual a ni mai. Kan dinhmun ṭha lo tak avanga kan talbuai tura ngai an awm a nih chuan tih theih kan nei lo. Min sawiselna kan pawm ang a, insiamṭhat nan kan hmang mai ang," a ti a, Foxes lakah point thum aia tlem a mitthla lo. 

Leicester-in Premier League table chung ber an luah mek a, match riat khel tawhin, khelh zat inangah Liverpool aia an sanna chu point khat a ni - zaninah Reds-in a chung ber aṭanga hnuhthlak an tum dawn a, an coach chu Anfield hrechiangtu, Klopp-a'n Liverpool coach ni tura a thlak tak Brendan Rodgers a ni.