Chelsea an ‘luck’ - lei duhtu an tam

UK sorkarin an ram chhunga a thil neihte khawih che thei lo tura an hrek mek Roman Abramovich-a'n Chelsea a hralh hnai ta a, Inrinni zing dar 2:30 khan Blues lei duhtute tana dilna thehluh hun chhung chu a tawp.

Chelsea a lei duh thu ualau taka sawitu, Blues fan ruhkawl Nick Candy chu hming langsar zingah a tel a, ani hian South Korea lam aṭanga thawhpui a neih thu sawiin, "Kan ngamna zat hi pound tluklehdingawn hnih chuang a ni," a ti.

UK sorkarin Abramovich a hrek avangin a tirah Chelsea hralh an tumna hi a buai deuh a, mahse, UK sorkar chuan Blues hi hralh a nih theih dan tur an ngaihtuah sak tel.

Chelsea lei duhtu tak tur thlitfim a nih hunah sorkar chuan Blues hralh phalna licence hi a pe dawn a, American investment firm Raine Group chuan London club hralh tur chungchang hi an buaipui a ni.

Blues leh Raine Group te chuan tun kar chhung hian Chelsea lei duhte chu an thlifim dawn a, thlitfim-te hian sorkar phalna an lak leh phawt a ngai ang - hetah hian an sum lakluhna leh hmanna te an tarlan a ṭul dawn.

Hei chauh a ni lo - club hi hralh tura an inrem a nih pawhin Premier League neitute leh director test an paltlang ngei a ngai dawn a, hei hi 'fit & proper person's test' tia sawi a ni.

Kum 2003 khan Abramovich-a'n pound maktaduai 140-in Chelsea a lei a, a hunlaia club vantlang tak hi European football club ṭha pawlah a chhuah.

Russian sumdawng hausa hian club hi pound tluklehdingawn thum a chhiar a, club hnena loan a puk tir pound tluklehdingawn 1.5 pawh rulh tura a tih loh tur thu a sawi.

Hei mai a ni lo - Abramovich hian club hralhna aṭanga hlawkna an hmuhte chu Russia leh Ukraine indona tuartute tan an hlan tur thu a sawi bawk.

Mahse, football finance expert Kieran Maguire chuan £3bn-a Chelsea zawrh chu a to lutuk thu a sawi a, a chhan berah chuan Stamford Bridge lian tawk lo chu a puh.

Stamford Bridge-ah fans 40,834 an leng mek a, Chelsea aia stadium nei lian zawk hi Premier League-ah ringawt pawh club pasarih lai an awm.

Maguire chuan, "Stamford Bridge hi club leituten an sum sente hmuh let nan a lian tawk loa ngai an tam a, stadium hi tuna a awmnaah chuan zauh belh ngaihna a awm tawh lo bawk.

"London khawpui hmun dangah stadium thar sa dawn ta se, a to lutuk dawn bawk si a ni," a ti a, Chelsea hi hralh a nih pawhin Abramovich-a beisei ang zat chuan hralh a nih a rinawm loh.

Chelsea lei tum langsar
• Liverpool chairman hlui Sir Martin Broughton leh a thawhpuite, an zingah hian London 2012 Olympic Games hotupa Lord Coe a tel.
• Major League Baseball team Chicago Cubs neitu Ricketts chhungkua pawh an tel a, anni pawh hi thawhpui nei tur tho an ni.
• Swiss billionaire Hansjorg Wyss leh US mi Todd Boehly te chuan Chelsea lei tum hian pawl an din a, American PR executive Barbara Charone, British sumdawng Jonathan Goldstein leh British journalist Daniel Finkelstein te chu an pawlah hian an tel.
• London-a hmunpui nei, investment firm Aethel Partners chu lei duhtu zingah an tel a, anni hi an hotupa chu Portuguese entrepreneur Ricardo Silva a ni.
• British multi-millionaire Nick Candy a langsar a, ani hi Chelsea striker hlui leh Tifosy company neitu zinga mi Gianluca Vialli, South Korea company Hana Financial Group leh London-a hmunpui nei C&P Sports Group ten an thawhpui.
• NBA team Philadelphia 76ers neitu Josh Harris hming a ri a, ani hian Crystal Palace-ah pawh share a nei.
• American football club New York Jets neitu Woody Johnson leh Saudi Arabia lama inkulh sumdawng intelkhawm pawh sawi rik an ni.