A hun tea rah Leeds United

Leeds United-in Premier League aṭanga tlak an tum lo - Zirtawpni zan khan an mikhualna ramah Wolverhampton Wanderers chu 3-2 in an hneh a, point sarihin relegation zone an tlansan.

Wolves khelmualah Leeds hi 2-0 in an hnufual hman a, mahse, minute 53-naa Raul Jimenez hnawhchhuah a nih hnuah an theihna an pholang a, goal thum an khung.

Molineux-a inkhelah hian Wolves tan Jonny leh Francisco Trincao ten first half chhungin goal khat ve ve an khung a, mualneitu team hi awlsam takin an chak mai dawn niin a lang hman.

Mahse, Jiménez-a'n ṭul loah red card a hmu a, Jack Harrison leh Rodrigo ten second half-ah si phurh an rawn sut zo a, hun pek belhah Luke Ayling chuan chakna goal a khung zui.

Inkhel chu
Mahni muala khel Wolves-in Leeds an hlau lo a, inkhel an thunun - minute 26-na lekah Jonny chuan July 2020 hnua a vawi khat nan goal a rawn khung a, 1-0 a ni der.

First half hun pek belh minute 11-naah Francisco Trincao a inlar ve leh a, ṭha zetin an goal hnihna a rawn khung. Wolves tan inkhel a awlsam a, Leeds an talbuai thung.

Goal dang lut loin chawlhlawk hman a ni a, minute 53-naah Jimenez a fimkhur lo hret. 50-50 ball nia lang chu Leeds keeper Illan Meslier nen an inchuh a, box pawna rawn tlan chhuak Meslier leh Jimenez an intauh a, Meslier a tlu.

Referee-in Mexican striker hi a che ngap hretah a ngai a, sawisel theih takin red card a pe - Leeds-in inkhel an thunun zui a, Harrison, Rodrigo leh Ayling hmanga chhangletin an chak.

A ṭul lo
Jiménez-a'n ṭul lo takin red card a hmu a, an chet chhiat phah tiin a sawi theih - Mexican striker hian yellow card hmu sa a nih avanga fimkhur ṭulnaah fimkhurna chang a hre lo a, a tawrh phah tiin a sawi theih.

Kum 30 mi striker-in red card a hmuh hma hian Wolves an khel ṭha takzet. Joao Moutinho chuan midfield-ah ro a rel a, Willy Boly chu tlarhnungah a nghet ṭha hle bawk.

Leeds hian a tira Rodrigo leh Patrick Bamford hmanga chance duhawm an neih chu an chhawr lo a, an tuar a ni ber - goal hnih an chhuah zui a, an khel a buai hle.

Mahse, vawi tam Wolves lo chhandam tawhtu Jiménez-a chesual a, hahdam hunah a inven loh avangin Leeds harhtharna bul ṭantu a ni a, a tawpah a tam zawk Leeds an chak.

Lawmna leh lawm lohna
Leeds-in Marcelo Bielsa an ban khan fans tam tak lung a leng a, kum 16 hnua Premier League-a an club hruai kirtu tel loa top flight football hmachhawn chu an ngai ngam lo.

Coach thar Jesse Marsch kaihhruaina hnuaiah match li an khel a, Leicester City leh Aston Villa lakah tlawm zui mah se Norwich City leh Wolves hnehin, league match hnih a zawnin an chak ve leh ta - tlak hlauhthawnna a bo ṭan.

Hetihrual hian Leeds hian first half-ah hliam vangin player pathum ngawt an lakchhuah a ngai a, an lawm a kim lo ang - tun season-a hliam vanga a hun tam zawk khelmual pawna hmangtu Bamford pawh a inhliam a, minute 23-naah lakchhuah a ngai.

Diego Llorente leh Mateusz Klich te pawh hliam vanga lakchhuah an ni a, goalkeeper Meslier pawh Jimenez nen an intihpalh hnuah lakchhuah a ngai bawk.

Thil thleng dang
Wolves leh Leeds inkhelah fan pakhat chu khelmualah a tlanlut a, Wolves goal-a mahni inphuar beh a tum laiin an la sawn hman - hei hi a vawi khat thlenna a ni tawh lo.

Nilaini zana Arsenal leh Liverpool inkhelah khan fan pakhat chu Liverpool goal lamah a kut phuar beh a lo tum tawh a, buaina tak tak a siam hmain lak sawn hman a ni.

Ningani zana Everton leh Newcastle inkhelah khan hetiang bawk hian fan pakhat a che leh a, a nghawng chu goal post-ah a phuar bet hman - Zirtawpni zanah erawh an hlawhtling ta lo.

He thil hi 'Just Stop Oil' tih hming chawi pawl ho thil tih a ni a, gas, oil leh lung alh thei hmanna pun zelna tura sorkar hmalakna dodaltu pawl an ni.