De Gea a tel lo, Raya leh Sanchez te an tel

Spain-in March thla tawp hian Albania (March 26 zan) leh Iceland (March 29 zan) te nen friendly match an khel dawn a, manager Luis Enrique-a'n Manchester United goalkeeper David de Gea a ko lo. Barcelona manager hlui hian De Gea ko lo mah se Premier League aṭangin Brighton keeper Robert Sanchez leh Brentford keeper David Raya te a ko tho.

Enrique chuan, "Raya hi hun rei tak a khel ṭha tawh a, national team-a awm tlakah ka ngai. A ke a hmang thiam a, kan team-ah chuan ke hmang thiam hi kan nga pawimawh. Mi ṭhahnem tak chuan mak an ti maithei a, keini tan chuan thilmak a ni lo," tiin Brenford keeper a fak.

Spain coach-in Raya a fak a, ram tana khel turin theihna a neih thu a sawi. Euro 2020 khelh zawh takah khan Enrique hian Real Madrid player-te a ko lo a, a tirah sawisel nasa mah se an result a ṭhat avangin an sawisel zui lo.

Tun ṭumah pawh De Gea a paih a, Manchester United keeper hi Unai Simon thachhang dawltu a nih tawh zawk avangin Enrique hian first keeper atana Simon chuhpui tur a melhah a ngaih theih.

Kum 26 mi Raya hian tun season-ah Bees tan vawi 15 a inlan tawh a, vawi nga a clean sheet - inhliam vangin a inlan tam tawk lo. Brighton keeper Sanchez hi vawi 28 a inlan tawh a, vawi sarih a clean sheet. De Gea hi vawi 29 a inlan a, clean sheet vawi sarih nei tawhin player langsar ber ni mah se thlan a ni lo.

Spain squad
Goalkeepers: Unai Simon (Athletic Bilbao), Robert Sanchez (Brighton), David Raya (Brentford).

Defenders: Marcos Alonso (Chelsea), Jordi Alba (Barcelona), Eric Garcia (Barcelona), Aymeric Laporte (Manchester City), Pau Torres (Villarreal), Diego Llorente (Leeds), Cesar Azpilicueta (Chelsea), Dani Carvajal (Real Madrid).

Midfielders: Rodrigo Hernandez (Manchester City), Koke (Atletico Madrid), Marcos Llorente (Atletico Madrid), Pedri (Barcelona), Gavi (Barcelona), Carlos Soler (Valencia).

Forwards: Dani Olmo (Leipzig), Pablo Sarabia (Sporting Lisbon), Alvaro Morata (Juventus), Raul de Tomas (Espanyol), Ferran Torres (Barcelona), Yeremy Pino (Villarreal).