Milan tan champion rim a nam

AC Milan chuan Serie A hma an hruaina an sawhnghet. Champion lai Inter Milan an chak zawh loh laiin Milan hian Cagliari 1-0 in an hneh a, table chung berah an awm chhunzawm - pahnihna Napoli aiin point thumin an sang.

Inrinni zan Serie A inkhelah Milan hian second half-a midfielder Ismael Bennacer goal hmangin hnehna an chang. Algeria international hian Olivier Giroud-a siamsak chu tawih zetin a khung a, goal dang a lut zui lo.

Cagliari forward Leonardo Pavoletti-a'n minute 90-naah goal bar a tauh per a, mikhual Milan an him hlauh. Stefano Pioli naute hian tun hnaiah a zawnin match thum chu 1-0 in hnehna an chang, champion rim a nam zel.

Italian manager Pioli chuan, "Champion sawi a la hun lo. Serie A nomawi hi team paliin kan inchuh mek a, champion thei vek kan la ni," tiin palina Juventus thlengin sawibo theih an nih loh thu a sawi.

Inkhel dangah Napoli chuan si an phurh hmasak hnuin Udinese 2-1 in an hneh. Gerard Deulofeu-a goal khung chu Napoli lamin Victor Osimhen-a goal hnih hmangin an chhang let a, point thum hlu tak an hlawh chhuak.

Champion lai Inter Milan chu Fiorentina nen 1-1 in an inhnehtawk. Lucas Torreira goal khung chu Denzel Dumfries-a'n sutin point an insem. Inter hian an khelh hmabakah hnehna chang pawh ni se Milan an umphak thei dawn lo.