Man United khingpui tur West Brom

Manchester United chuan zanin dar 1:30-ah Premier League kai thar West Brom an mikhual dawn a, Ole Gunnar Solskjaer-a hote tan a zawna chak theihna hun ṭha a inhawngah a ngaih theih.

Baggies hian match riat aṭangin point thum chauh an hmu a, Man United tan harsa tur a awmin a lang lo. Amaherawhchu, West Brom hi Old Trafford-a Premier League match hnuhnung panga an khelhah vawi khat chiah an chak lo a, vawi thum an chak!

Chu chauh chu a ni lo, United hian Old Trafford-a Baggies an hmachhawn hnuhnung pali zinga pathumah goal an khung lo. Solskjaer hote hian tun season-ah Old Trafford-ah chak an la nei lo bawk.

Chutihrualin West Brom lakah hian Man United hi chak ngei tura ngaih an ni a, an chak loh erawh chuan an hmabak a thim ngei ang. Solskjaer-a'n inhliam vangin Luke Shaw a chhawr thei lo a, English left back aia a chhawr tur player hi hriat a châkawm hle.

Covid-19 positive vanga hun rei tak chawl tawh Brazilian left back Alex Telles pawh a negative leh tawh a, Premier League-a inlanna remchang a nei thei dawn. Solskjaer-a'n Shaw aiah hian Telles bakah Brandon Williams, Axel Tuanzebe leh Marcos Rojo te a la chhawr thei bawk.

United-in an match hnuhnung berah Everton an hneh a, hemi ṭum hian Mason Greenwood a tel lo. English rawlthar duhawm hi training-naa a thatchhiat vanga tel lo anga sawi a ni a, Solskjaer erawhin a chhan tlat. West Brom nen hian Greenwood hi Marcus Rashford leh Anthony Martial te nen a inlan tawh beisei a ni.

Uruguayan forward Edinson Cavani chu ram tana a inkhelhnaah hnawhchhuah a ni a, Premier League-ah erawh inlan thei mah se South America-a zin a nih avangin a hahdam a rinawm. 

United ṭantute hmuh châk ber tur erawh Bruno Fernandes a ni a, Portuguese midfielder kawppui tur hian ram tana khelh apianga thawm nei ve ziah Paul Pogba aiah Scott McTominay leh Fred te an luh a rinawm zawk.