Khatla TBL leh Tuikual South tan fiahna
Zanin dar 7:30 hian Khatla TBL leh Tuikual South ten Mizoram Super League semifinal game 1 an khel dawn a, team pahnih hi champion thei tur khawpa squad nei ṭha an nih avangin an tan fiahna hautak a ni dawn. Hawla Indoor Stadium, Republic Vengthlanga ṭhutna ṭha chang tur chuan kal hma a finthlak ang.
Team pahnihte hi MSL2 final khan an lo intawng tawh a, Khatla TBL lamin 2-1 a series lain a vawi hnih nan an champion. MSL3 leh MSL4 league round bikah Tuikual South lamin hnehna an chang let ve thung a, kumin league round-ah TBL bawk 102-83 in an chak; semifinal bika an vawi khat intawnna turah record nei ṭha zawk nih an tum dawn.
Fiahna
MSL season hmasa pahnihah Khatla TBL an chungnung hle a, tun hnai season hnuhnung pahnihah erawh Mission Veng Vikings leh Zarkawt BCA an champion thung - H. Laldinsanga (Mapuia) kaihhruaina hnuaia khel hian an ropuina ang neih let an tum mek a, zanin hi an tan fiahna a ni ang.
Khatla TBL coach cum player Mapuia chuan, "Kan ṭha tak tak em tih chu fiahin a awm dawn a, kan tan fiahna hmasa tur a ni. Kan inbuatsaihna a ṭha tawk a, kan zir angin kan khelh chhuah theih ngei ka beisei," tiin Vanglaini a hrilh a, semifinal mai ni loin nomawi inchuhnaah tel ngei an tum thu a sawi bawk.
TBL hian NCAA player Veron Young an chah lut a, Tuikual nen an intawn hmasakin Young hian point 48 zet a score bakah rebound vawi 10 a la bawk a, Young hi Player of the Night atan thlan a ni. Phengphehlep lam tan American player ven hi hnapui hmasa tur a ni dawn.
Khatla hian Mapuia an neih hi an thlamuanpui a, chutih rualin Saron Veng tlangval hian player naupang zawk tan hmun a kian fo ṭhin. MVP ni tawh Vanlalmuana bakah tawnhriat ngah dang Moses Zoremmawia leh Vanchuangpuia te an neih belh tawh avangin boruak sangah an buai lo ang.
Phengphehlep hun
MSL neih ṭan a nih aṭangin Tuikual South hi team ṭha leh hmuhnawm an la ni chho char char a, a hmawr bawktu erawh an la ni chiah lo. Season dang ang bawkin an thawhhona ṭha leh fans chu an innghahna a ni leh a, zaninah pawh an thawm a ring dawn.
Tuikual South manager Lalremsiama Hrahsel chaun, "Pathian hnenah kan inhlan a, fans ṭha tak puihna zarah hnehna chan theih kan in beisei. TBL hi hneh let ngei kan tum a, chumi tur chuan rim takin inbuatsaihna pawh kan nei.
"Round hmasa lama kan chak lohna pahnih khan kan enlet chuan point 80 kan score tling ve ve tho a, chak pui tham a ni. TBL laka hnehna chang tur chuan keimahni lam kan inven thiam a ngai dawn," tiin Vanglaini a hrilh.
Phengphehlep tan league round lama an chhawr ṭangkai Shashank J Rai chu hna thil vanga a haw avangin a inlan thei dawn lo. Shashank awm lo tur hi TKS tan channa a tling, chutih rualin F. Zodinthara a la awm avangin chiai lutuk tur erawh a ni lo ang. Dina hian TBL an tum hmasak ṭumin point 26 ngawt a vawm lut a ni.