Rawlthar thiam ber Chhinga Veng

Mizoram Premier League Under 18 chu nimin tlai khan Lammualah final khelh niin, champion lai Chhinga Veng chuan Mizoram Police lakah 3-0 a hnehna changin an nomawi kawl lai an humhim. Chhingcows champion puitu C. Lalchungnunga chu best player a thlan a ni.

MPL kum bithliah inelna huangah Chhinga Veng hian match kua an khelh aṭangin hneh loh an tawng lo a, coach Lalremruata kaihhruai Chhingcows hi Chanmari FC leh Police hnuah a zawna champion leh thei hmasa ber an ni.

Goal thum

Lammuala inkhelah Chhinga Veng hian league round lama an hneh tawh lakah inkhel an thunun nghal a, minute 16-na lekah Ramhlunchhunga chuan freekick aṭangin goal hmahruai a khung. Goal khungtu Chhunga thawhrah sengtu C. Lalchungnunga chuan chawlhlawk hma deuhin an goal hnihna a khung bawk.

MPL U-18 huanga a naute vawi hnih champion pui tawh Lalramhluna enkawl Mizoram Police lamin chawlhlawk hnuah si phurh sut tum mah se, Chhinga Veng tlarhnung laia ding R. Lalhmingmawia leh a ṭhiante an dingkhawng tlat a, hun tawp hma deuhin Chungnunga ball pek dawngtu Lalramdinthara chuan box chhung hnai tak aṭangin chak nemnghehna a khung.

An lawm

Chhinga Veng coach Remruata chuan, "Kan nauten theihtawp an chhuah a, training-na hmunah an thawhrim rah chu khelmual chhungah a rawn lang chhuak ta a ni. Final vawi hnih kan khelh tawh chinah a chak zawk a kan ṭan theih avangin Pathian malsawmna kan dawng," tiin Vanglaini a hrilh.

Chhingcows player pali Emma-nuel Lalchhanchhuaha (midfielder), R. Lalhmingmawia (defender), Lalhmingchhuanga (midfielder) leh Lalhriatpuia (striker) te chu Mizoram Under 18 team tan koh an ni nghal a; tualchhung coach tawnhriat ngah Remruata chuan an naute hlawhtlinna vanga an lawm thu a sawi bawk.

MPL Under 18 Final
Season Pakhatna Pahnihna
MPL1 U17 Chanmari FC Dinthar FC
MPL2 U17 Chanmari FC Dinthar FC
MPL3 U18 Mizoram Police Dinthar FC
MPL4 U18 Mizoram Police Dinthar FC
MPL5 U18 Bethlehem VT Chanmari West FC
MPL6 U18 Chhinga Veng Dinthar FC
MPL7 U18 Chhinga Veng Mizoram Police

Lawmman
Champion Chhinga Veng FC Rs 10,000/- Trophy
Pahnihna Mizoram Police FC Rs 5,000/- Trophy
Fairplay Chhinga Veng FC Rs 2,000/- Trophy
Mimal Lawmman
Top Scorer F. Lallawmkima (10 Goals) Chhinga Veng FC Rs 500/- Trophy
Best Midfielder Lalremruata Hauhnar Aizawl FC Rs 500/- Trophy
Best Forward F. Lallawmkima Chhinga Veng FC Rs 500/- Trophy
Best Defender Saidingliana Chhinga Veng FC Rs 500/- Trophy
Best Goalkeeper Johny Vanlalhriatpuia Chhinga Veng FC Rs 500/- Trophy
Best Player C. Lalchungnunga Chhinga Veng FC Rs 500/- Trophy