Eng vangin nge MPL7 semifinal en a châkawm em em?

Mc Dowell's No. 1 Soda Mi­zo­ram Premier League Sea­son 7 semifinal-ah inelna ṭan hmaa team lian pali 'Big 4' tia sawi theih Chhinga Veng FC, Aizawl FC, Mizoram Police FC leh Chanmari FC te an lut a, tualchhung football ngainatute tan club hming ringawt pawh hi en tichâkawm tu an ni nghal.

Tun Inrinni zan hian cham­pion lai Chhinga Veng leh vawi hnih champion tawh Chanmari FC te an inkhel dawn a, November 26 zanah Mizo­ram Police FC leh I League club Aizawl FC te an inhmachhawn bawk dawn. Semifinal lut zingah Police chiah hi MPL-a la champion lo awmchhun an ni a, chutihrualin an player neih dan thlira tawnhriat nei ṭha ber an ni thung.

Goalkeeper ṭha

MPL semifinal inlan tur keeper te hi Mizo goalkeeper ṭha ber ber te an ni. Aizawl FC-in best goalkeeper kum zawna vawi li dawng thei Lalawm­puia an kawl a, Aizawl Venglai tlangval hian state pawn player Gurpreet Singh nen khelhna hmun an inchuh dawn.

Mizoram Police-in best goalkeeper nilai F. Lalmuan­awma an kawl a, Khawbung tlangval hi match zawng zawng­ah a inlan thei lo chungin vawi thum man of the match-ah thlan a ni tawh. Police coach Lalbiaksanga Colney-in keeper dang a awt bik lo ang.

Chhinga Vengin Mizo ball sem thiam ber zinga mi Zothanmawia an nei a, Col­lege Veng tlangval hi man of the match-ah vawi hnih thlan a ni. Chanmari lamin MS Dawngliana leh Lalruatpuia te an nei a, semifinal thleng pha lo keeper an awt bik lo ang.

Defender hi...

MPL best defender ni tawh zingah tualchhung football-a khel pahnih Lalrinchhana Tochhawng leh H. Lalhlimpuia te an awm a, a kalna apianga nomawi keng tel tia sawi theih Rinchhana hi Aizawl FC tlarhnung tichaktu a ni.

Chhinga Vengin an player ṭha an chhuah a, player ṭha dang an lalut. PC Laldinpuia chu Sanga kaihhruaina hnuaiah Mizo defender ṭha ber zingah a chhal theih tawh. Police pawhin tawnhriat nei ṭha Lalrinzuala Khiangte te an kawl a, Chanmari FC-in C. Lalrosanga an nei thung. Lunglei tlangval Rosanga hi theihna nei sang tak ni mah se tun season-ah vawi thum lai hnawhchhuah tawh a nih avangin semifinal an luhna kawnga player ṭangkai zinga chhal tel erawh a harsa thung.

En châkawm attacking

Mizoram Police-in Mal­sawm­­fela, R. Malsawm­tluanga, F. Lalrinpuia, Lalfak­zual­a leh Lalbiakhlua te an ni a, heng player te hi tualchhung football-ah chuan sulhnu nei ṭha ber ber an ni a, an khelh ho tam tawh avangin semifinal chinah chuan an hmuhnawm dawn.

Champion lai Chhinga Veng hi nomawi humhim turin ṭha tawk mah se season liam ta angin inelna an thunun tawh lo. Chutihrualin player hmuhnawm MS Dawngliana rawn che ṭha chuan semifinal en a ti châkawm a, an foreign player Gatch Diomande chu a tikimtu ni ringawt loin chakna hnar a ni bawk.

Chanmari tan MPL5 top scorer Laldampuia a rawn che ṭha chho a, match hnu­hnung pathuma goal a khung vek avangin a team khelhna pawh dah hniam theih a ni lo. Dampuia thlawp tur hian Vanlalbiaa Changte leh Lal­muanzova te an awm tih theihngilh lo a ṭha.

Aizawl FC-in an squad neih ṭhat ber an chhuah pui a, an rem fuh bawk chuan champion thei tur an ni a. Alfred Kemah Jaryan leh Ansumana Kromah te an kawl a, season tawp lamah Lalruatfela Zote leh rawlthar Lalremsanga rawn che ṭha bawk nen an goal bawh a na leh tawh hle.

A behbawm

Thlasik boruak a inṭan a, ruah a sur tawh lo a, hun awl hnawh khah nana zan lama ṭhian hoa chhuah nan Lammual hi hmun ṭha tak tiin a sawi theih.

Khelmual chheh velah in­hnawh puarna tur ei tur tui hnai tak tak a awm a, tun­laia an bawh em em food truck pahnih 'Zo Global' leh 'Just Chill' te chuan inkhel en nawmna an belhchhah bawk.