Federer ring lotu Toni Nadal

Rafael Nadal-a coach hlui Toni Nadal chuan tunlai tennis boruak inlumlet vel a thlir dan a sawi a, season thar lo awm turah Roger Federer tan Grand Slam nomawi chawi a beiseiawm loh in a hriat thu a sawi.

Tun hnai kum 14 chhung chu Federer leh Nadal ten nomawi lian an insem tia sawi theih a ni a, an inkarah hian Novak Djokovic chu rawn tlazep langsar a ni - player dang pawh champion awm ve mah se anni nena khaikhin atan chuan an langsar lem lo.

Grand Slam vawi 20 cham­pion tawh Federer hi kum 37 mi a ni tawh a, a elpui Nadal leh Djokovic te hi kum 32 leh 31 an ni thung. Tun hnaiah player beiseiawm an rawn chhuak nual a, chung zingah chuan ATP Finals nomawi chawitu Alexander Zverev a langsar bawk.

Toni Nadal chuan, "Federer tan hian Grand Slam nomawi dang chawi belh leh chu a harsat tawh ka ring, a kum zat kan hria a, a theihna leh thiam­na san zia pawh kan hria. Chutih rualin best of five inelna hautak zia kan ngaihtuah tel pui a ngai a ni.

"Player ṭha bik tan chuan tih theih loh chu a ni hauh lo ang, amaherawhchu player beiseiawm an chhuah ve zel bakah a ṭha dang an rawn chhuak ve zel a ni," a ti a, season tharah chuan Nadal leh Djokovic te chu inel ber tura a ngaih thu a sawi tel bawk.