Australia hmaah India tlawm nghal
Test series, ODI leh Twenty 20-a West Indies laka series la vek hlim India chuan twenty20 international khel turin Australia an pan a, an match hmasa berah an tlawm nghal.
Australia an bat hmasa zawk a, over 17-ah run 158 siamin wicket li an hloh - ruah surin inkhel a tihbuai avangin over 20 khelh a ni lo a, Duckworth Lewis Stern method hman a ni.
DLS hmang hian India chu target 174 tuk sak an ni a, chak tura beisei an ni. Mahse, beisei ang ngawt erawhin thil a kal lo.
India tan hma taka Rohit Sharma (7 runs) a out hnuah pawh Shikhar Dhawan rawn che ṭhain run 76 ngawt a rawn vaw chhuak a, India-a chhanhimah ngaih theih a ni.
Mahse, Men in Blue te an vannei tawk lo. Dhawan thachhang dawl zotu an hmu lo a, batsman dang zingah run 30 aia tam siam an awm lo!
Over 17-a India tlin tawk chu run 169 chiah a ni a, wicket sarih hlohin run liin an tlawm a, Australia an chak daih.
India cricket team hian vawiin chawhnu dar 1:20-ah match an khel leh dawn a, series-ah match thum chauh an khelh dawn avangin vawiinah an tlawm leh a nih chuan twenty20 bik chu Australia-in an la fel ang.
T20 zawh hnuah team pahnih hian match li awh tur test series an khel leh ang a, chumi hnuah ODI series match thum awm turin an khel leh dawn bawk a ni.