Shillong Lajong khelmualah Minerva Punjab

Indian rawlthar rual hlanga khel Shillong Lajong-in match hmasa bera Aizawl FC an hneh hnuah chak an nei leh tawh lo a, vawiinah insiamṭhatna hun an nei dawn.

Meghalaya club ṭha hian Gokulam Kerala laka tlawm hlim Minerva Punjab an mikhual dawn a, champion team lakah hnehna chan ngei an duh ang tih a chiang - chumi tur chuan player an nei bawk.

Samuel Lalmuanpuia captain-na hnuaia khel Lajong hian match nga an khelh tawhah vawi khat chiah an la chak a, mahse an home-ah tawh an khirh ṭhin avangin vawiin an inkhel tur pawh a hmuhnawm ang.

In anna duhawm lo!

Shillong Lajong leh champion lai Minerva Punjab hian tun season-ah in anna pakhat an nei a, chu an inna erawh Aizawl FC ṭantu tana thu hriat nuam tak a ni lo.

Club pahnih hi tun season I League-ah match khat ve ve an chak tawh a, an hneh awmchhun hi Aizawl FC ve ve a ni - hei hi tun season-a Mizo club dinhmun sawifiahna ṭha tak a ni nghal!

Minerva hian match li khelhah point li chiah an la nei a, match ngaah Lajong hian point thum chiah an la nei thung - zanin hi Punjab club tlan pelhna remchang a ni a, a thlawna liamtir ngawt chu an duh lo ang.

In ang lo si!

Lajong neitupa Larsing Ming-a'n tun season-ah thutlukna huaisen thlak tak a siam a, ram pawn player tan sum seng loin rawlthar rual a neihte chu I League a hmachhawn tir.

Mahse, hei tak hi Minerva tan chance ṭha a ni. Punjab club hian Aizawl FC lakah an defender pasang Lancine Toure sanna chhawr ṭangkaiin set piece-ah an innghat a, Toure khung ve ve a ni.

Midfield-ah William Opoku-a'n a thiam ngaiin a la thiam reng bawk a, Lajong rawlthar ten mahni muala point thum hmuh loh an duh lo a nih chuan Minerva foreigner tharum ngah leh tlan chak an ven a ṭul ang.

Samuela hi...

Mohun Bagan coach Shankarlal Chakraborty-a'n, "Kan rama set piece pet thiam ber pawl a ni," tia a sawi Samuel Lalmuanpuia hi Lajong innghahna a ni a, zaninah pawh a hmuhnawm leh dawn.

Zemabawk North tlangval hian match hnuhnung bera Churchill Brothers an hmachhawn ṭumin goal a khung a, mahse an vanduai ṭum an tawn avangin an chak lo.

Lajong hian Samuel-a bakah F. Lalrohlua leh Lalawmpuia Hnamte an kawl bawk a, Mizo pathum hian hmun pawimawh an chang phak vek - zaninah hnehna chan an duh chuan anni hi an ṭangkai ang.