Pune City an chak ve ta

Match sarih ngawt a zawna hnehna an chan zawh loh hnuah Pune City chuan hnehna an chang ve ta a, an mikhual Jamshedpur FC chu 2-1 in an lo hneh.

Maharashtra club tan tun season-a an chak vawi khatna a ni a, tun hnaia team boruak neuh neuh awm reng chu an veng hawk ngei ang - match riatah point nga an neih vena chiah a ni.

Pune City tan hian Diego Carlos chuan minute ngana lekah goal hmahruai a khung a, mahse minute nga hnuah Sumeet Passi chuan si phurh hi a sut.

Mahni mualah Pune-in an hri chhe vei an tlansan dawn lo niin a lang hman a, mahse hun tawp nan minute li chiah a awm tawh tihah chuan English defender Matt Mills chuan goal rawn khungin Pune an chak.

Pune City tan regular taka inkhel bul ṭan ṭhin Lalchhuanmawia Fanai hmuh tur a awm lo a, hetihlai hian hliam vanga rei tak chhawr theih loh Iain Hume chu bench aṭanga luhtir a ni thung - tun season-a a vawi khat inlanna a ni.

Mizo rawlthar duhawm Jerry Mawihmingthanga chu he inkhelah hian Emerging Player of the match atan thlan a ni a, mahse Chanmari tlangval hian mimal chawimawina a hawn zanah a team erawh kut ruakin a haw pui.

Zanin dar 7:30-ah inkhel pakhat a awm dawn a, mahni muala la chak lo NorthEast United chuan an match hnuhnung paruka la chak miah lo Kerala Blasters an mikhual ang.