Saina leh Kashyap an chak

Syed Modi World Tour Super 300 khelh mekah Saina Nehwal leh Parupalli Kashyap te chuan an match hmasa berah hnehna an chang a, hetihlai hian mixed doubles champion lai Pranaav Jerry Chopra leh N. Sikki Reddy te erawh an chak lo nghal.

Seeded pahnihna Saina hian Kate Foo Kune chu 21-10 21-10 in a hneh a, Commonwealth Games champion tawh Kashyap pawhin Thailand tlangval Tanongsak Saensomboonsuk chu 21-14 21-12 in a hneh ve bawk.

London Olympics bronze medallist Saina hian a match lehpekah chuan Amolika Singh Sisodiya a hmachhawn ang a, mipa singles player Kashyap pawhin Firman Abdul Kholik a bitum ve thung bawk ang.

Inkhel dangah Singapore Open champion hlui B. Sai Praneeth pawhin Sergey Sirant 21-12 21-10 in a hneh a, ani hian Shesar Hiren Rhustavito a hmachhawn leh dawn a ni.

Indian singles shuttler ten result ṭha an neih lai hian, mixed doubles champion lai Pranaav Jerry Chopra leh N. Sikki Reddy te erawh 14-21, 11-21 in Chinese player Ren Xiangyu leh Zhou Chaomin te ṭangdun lakah minute 31 chhungin an chak lo.