I League-in chawimawina dawng

India rama football inelna sang ber I League chuan Asian Football Confederation hnuaia SPIA Awards-ah “Best Developing Football League of the Year”-ah pahnihna dinhmun a luah a, Thawhlehni zan khan he chawimawina hi AIFF hotute hnenah hlan a ni.

Bangkok khawpuia awards semnaah hian Asia khawmualpuia league hmasawn berah Vietnam league sang ber V.League 1 chu thlan a ni a, I League hnuai chiahah hian Indonesian football inelna sang ber Go-Jek Liga 1 chuan pathumna dinhmun an hauh ve bawk.

Kum 2016-17 season-a Aizawl FC-in mak tak maia I League nomawi an chawi hnuah India rama top flight football inelna hian ngaihven a hlawh zual a, tun hnai kum thum chhungin entu an pung viau bawk.

I League CEO Sunando Dhar chuan, "Hei aia hlu zawk minti phur thei a awm chuang lo. He award hian kawng dik kan zawh zel a, hma kan sawn zel tih min kawhhmuh a ni," tiin a sawi.