Under 19 Cricket World Cup India-in Pakistan hnehin final an lut

Under 19 Cricket World Cup semifinal-ah India chuan Pakistan hnehin final an lut. February 4, Ningania semifinal khelhah hian Yashasvi Jaiswal-a'n thi loin run 105 a siam a, India-in wicket 10-a hnehna an channa kawngah a pawimawh hle.

South Africa-a inelna neih mekah hian vawiin hian New Zealand leh Bangladesh ten semifinal hnuhnung zawk an khel dawn a, final hi February 9, Pathianni hian JB Marks Oval, Potchefstroom-ah khelh tur a ni.

India leh Pakistan a nih tawh chuan eng infiamna pawh ni se ngaihven a hlawh ṭhin a, tun ṭuma an inhmachhawnna pawh hi Under 19 a ni chungin ngaihventu an tam hle. Ṭhumvawrah Pakistan bat hmasak an thlang.

Pakistan opener Haider Ali-a'n run 56 siam mah se ball 109 a hmang a, wicket keeper Rohail Nazir-a'n run 62 siam ve bawk mah se batsman dang zawng India bowler lakah an zawr. 

Pakistan hian over 43.1-ah run 172 siamin an thi vek a, Sushant Mishra-a'n wicket thum (28/3) a lak bakah Kartik Tyagi (32/2) leh Ravi Bishnoi (46/2) te an che ṭha hle.

Champion lai India tan target harsa a ni lo a, Yashasvi Jaiswal-a'n run 105 a siam bakah Divyansh Saxena-a'n run 59 siam bawkin over 35.2 lekah run 176/0 siamin an chak.

India-in Pakistan an hneh theih nana century siamtu Yashasvi Jaiswal hi cricket ngainatna ramah hian mi thar a ni tawh lo a, kum 18 mi lek a ni chungin hming a chher viau tawh. Kum 2015 khan school inelna Giles Shield match-ah thi loin run 319 a siam a, bowling lamah pawh 99/13 a neih phak avangin Limca Book of Records-ah a hming a 

chuang tawh.

Jaiswal hi Mumbai U16-a koh a nih hnuah India Under 19 tana koh a ni a, ACC Under-19 Asia Cup-ah pawh run 318 siamin run siam tam ber a ni a, player of the tournament-ah thlan a ni. Domestic cricket-ah pawh Mumbai tan sulhnu ṭha tak a nei a, 2020 IPL auction-ah Rajasthan Royals-in an la.

Pakistan cricketer ropui Shoaib Akhtar te pawhin ha hipa an fak Jaiswal zinkawng erawh a bumboh ve hle. December 28, 2011 khan Suriyawan, Uttar Pradesh-ah a piang a, hardware dawr neitu Bhupendra Jaiswal fa paruk zinga palina a ni. 

Kum 10 mi a nih laiin cricket zirna hmun Azad Maidan-a inzir a duh avangin Dadar, Mumbai-ah a insawn. Dadar aṭangin Maidan hi a hlat avangin Kalbadevi-ah a insawn a, amah inchawm nan bawnghnute kaihhnawih dawrah a inhlawh. 

Cricket training-naah Jaiswal hian hun a hman tam avangin dawra a thawhna aṭang pawhin an ban a, awmna a neih loh avangin Maidan-a ground enkawltute awmna puan zarah a awm. Ril ṭam tih reh nana mu tawp ṭum a ngah a, amah a inchawm theih nan panipuri a zuar bawk.

Kum thum chhung puanzara hun a hman hnuah December 2013 khan Jwala Singh-a'n a hmu fuh a, ani hian Santacruz, Mumbai-ah cricket academy a nei. Jwala Singh hian a bulah chentirin Jaiswal hian tun dinhmun hi a thlen theih phah a ni.