Zaninah Lammualah inkhel hmuhnawm ; Chanmari ropuina hliahkhuhtu Chhinga Veng
Mc Dowell's No. 1 Soda Mizoram Premier League Season 7 semifinal thawh khatna chu zanin dar 7:30 hian Chhinga Veng leh Chanmari FC ten an khel dawn a, tualchhung football ngainatute tan kartawpah inkhel hmuhnawm Lammualah en tur a awm dawn tihna a ni.
Minute 180
MPL hi league round-a khelh hmasak a ni a, team 14 chu vawi hnih ṭheuh an inkhelh kual hnuah a sang paliin semifinal an lut. Pakhatna leh palina ten semifinal pakhat zawk an khel a, chu chu zanina inkhel turte hi an ni.
Final khel tur hi double leg-a zawn tur a ni a, minute 180 an khel dawn. MPL dan siam ṭhat an nih hnuah knockout stage-ah away goal rule tih tawp a ni a, team A leh team B chuan an jersey hak tur leh jersey hak tur chauhah nghawng a nei ang.
Champion lai Chhinga Veng ṭantute chu K. Kawla Stand leh S. Malsawmtluanga Stand-ah ṭhut tur a ni a, Chanmarians tan Zohmingliana Stand leh Zohminga Zote Stand zuah sak an ni a, neutral supporters tan tlang lam dah a ni bawk. Veng lian pahnih inkhel tur a ni a, mahni ṭhutna mawi tham kalkkhawm thei tura hruaitu an neih ṭhat avangin inkhel entu an tam a rinawm.
Ropuina daltu?
Chanmari FC-in MPL5-ah coach Lalsangzuala Hmar hoin MPL nomawi a vawi hnih nan an chawi a, hemi hnu hian player ṭha tak tak an kawl chungin nomawi an chawi leh tawh lo. Sanga erawh a club enkawl Chhinga Veng chu nomawi chawi theih zawng zawng a lak pui vek a, chumi tur chuan record a siam nual bawk.
Tun hnaia Chhinga Veng an ropui tak avangin tun hmaa Chanmari ropuina pawh a hliahkhuhah a ngaih theih a, tun season-ah pawh Chhingcows hian Chanmarians hi MFA Super Cup final-ah an hneh a, Serchhip-ah pawh MPL vawi hnih champion tawh hi hneh lehin coach Lalruatliana Sailo an thlakna chhanah a ngaih theih.
Amaherawhchu coach Chawng-thansanga hnuaiah Chanmari leh Chhinga Veng hi goal awm loin an inhnehtawk. League round tawp lam thlirin team pahnih inkar hi a zim tawh a, Chanmarians tan tun hi phuba lak theihna remchang a ni.
Mipui an pawimawh
Chanmari FC-in semifinal an luh theihna chhan chu mipui a ni a, Aizawl FC an hneh ṭumin ṭantu nei ṭha lo se point thum an hlawhchhuah a rinawm loh. Coach Chawngthansanga chuan, "Chanmari mipui kan mamawh a, knockout stage chinah chuan mipui hi an hlu lehzual a ni," tiin Vanglaini a hrilh a, Chanmari coach hi a chenna veng Tanhril pawhin an ṭawiawm ṭha leh khawp ang.
Chhinga Veng coach Lalsangzuala Hmar pawhin, "Zep tur a awm lo. Tun dinhmunah chuan Chanmari FC hi entu lamah kan pha lo a, semifinal-ah chuan Chhinga Veng hian khelmual chhung leh pawnah kan phak a ṭul. Training-naah kan thawkrim em em a, kan thawhrim rah kan seng theih nan min rawn ṭawiawm ngei ka beisei a, ka ngen bawk," tiin inkhel en turin mipui a sawm.