Chanmari leh Chhinga Veng Player-ah hian duh thlan tur zawk ka hre lo - Sanga

MPL7 league round hmahruaitu chu Chhinga Veng an ni a, anni hi Mizoram Premier League champion lai ni satliah loin MFA Super Cup leh I Day Football-a a zawna champion thei an ni. Chhingcows hian coach Lalsangzuala Hmar hoin tualchhung football an thunun a, tun hnaia coach hlawhlting ber Sanga hian a team Chhinga Veng leh Chanmari te chu an player neih dan aṭanga tehin ṭha zawk an awm loh thu Vanglaini a hrilh.

Chhinga Veng chu...

Chhingcows hian season tluanin inhnliam pahnih thum an nei reng a, chuti chunga an result-ah a lang lo hi an fakawmna lai chu a ni. Semifinal-ah 100% a la dam lo awm bawk mah se player zawng zawng a ṭul dan a zira chhawr theih vek an ni.

Keeper Zothanmawia'n a hnung bera dingin captain armband a hreng dawn a, College Veng tlangval hmaah PC Laldinpuia leh Vanlalzuidika te an din dun a rinawm a, mual sirah Hmingthnamawia leh Vanlalchhuanga te an awm thei bawk. Zuia leh Chhuanga te hian MPL an vawi khat khelhnaah an che ṭha a, match pawimawha anni aia tawnhriat ngah zawk K. Lalthlahlova leh Lalmalsawma te aia lut tur zawka ngaih an ni.

Sanga hnuaiah game rang tak an khelh ṭhin avangin midfielder ball pet thiam Jacob Lalrawngbawla'n bul a ṭan a rinawm lo zawk. Midfield trio-ah Lalrinchhana, Lalromawia leh Lalmuansanga te an awm thei a, anni pathum palian lo mah se che rang vek an ni. Chutihrualin target man atan Lalrammuanpuia an luhtir a nih chuan Muansanga aiah match hnuhnung palia goal thum khungtu Gatch Arthure Diomande a awm a, tun hnaia a chet ṭhat avangin hmun pawimawh a chan a rinawm.

Tlarhmaah goal sarih khung tawh MS Dawngliana a inlan ngei dawn a, tlarhma pathum zinga khawiah pawh dah se Bawngkawn tlangval hian a chan hi chu a hnehsawh khawp ang. Goal nawr tur hian Lalrammawia, Lalsawmzela leh F. Lalnuntluanga te chhawr theihin an awm bawk.

Chanmari hi...

Chawngthansanga enkawl hnua Chanmari FC danglamna chu goalkeeper pahnih MS Dawngliana leh Lalruatpuia inkarah kum lama upa zawk MS-a chu first choice keeper-ah a dah nghet a, forward naupang Lalnunzama chu mawhphurhtuah ruat loin tawnhriat ngah zawk MC Malsawmzuala chungah mawhphurhna a hlan chhawng a. Goal ruk ngawt khung tawh Chanmari rawlthar Zama hi semifinal-ah pawh substitute aṭangin a rawn lut ang.

Player anga chhut a, Chhhingcows aia Chanmari ṭhatna zawk nia lang chu an tlarhnung a ni. Chanmari hian tlarhnungah C. Lalrosanga, R. Lalawmpuia, Thomas Lalengkima, Lalmuanawma (C. Muana) leh rawlthar Lalmuanawma (Munez) te season ṭantirh aṭangin an kawl a, Chawnga vanneihna chu a enkawl hnuah wing back ṭha Immanuel HS Lalṭhazuala an lalut a, Aizawl FC defender hlui hi a pawp lai hnawh phuitu ni ringawt loin goal nawr kawngah a ṭangkai bawk.

Chutihrualin Rosanga chanchin sawi hmaih theih a ni lo a, MPL defender ṭha ber zinga mi ni mah se tun season-ah erawh ṭum thum hnawhchhuah a ni a, record thar a ni. League match 14-ah hrem vangin match nga squad-ah dah a ni lo a, match hnih dang bench-ah a ṭhu tluan a, hei vang hian season chanve tawp chu chhawr lohin a awm tihna a ni. Match sarih a inlanah hian match thum chiah a khel tluan a, tun season-ah minute 483 chiah khelmual chhungah hun a la hmang. Lunglei tlangval hian minute 90 chhung ṭha taka a khelh tluan theih chuan Chanmari chu team dang an ni ang.

Goal nawrtu lamah mual sir lam hi Chanmari chan ṭhatna niin a lang a, match hnuhnung pathuma goal khung thei Laldampuia, Lalmuanzova, Vanlalbiaa Tochhawng, Ṭhasiama leh Khelo India best player Lalnunzama te kawl chuan club dang chunga leng thei an ni a, amaherawhchu season tluanin an winger-te ṭhatna a lang lo tiin a sawi theih. MPL nomawi an chawi ṭuma khel ṭha em em Mabiaa'n goal khat chauh a la khung te, Muanzova leh Ṭhasiama'n goal an la khung loh chhan te chu sawifiah harsa tak a ni a, amaherawhchu Dampuia pawhin round 12-na aṭang chauhin goal a khung ṭan tih hriat a ṭha.

Midfield laiah Lalnuntluanga, Rochhingpuia, KC Larchhuakmawia, C. Lalhriatpuia leh Jeremy Laldinpuia te an awm a, Chhinga inhliam a la dam loh avangin Ṭhasiama hi midfield laia chhawr theih a ni. An theihna thlira player ṭha pangngai chunglam vek ni chung siin helai hmunah chuan Chhingcows an pha lo a, team pahnih danglamna chhanah pawh a ngaih theih. Chutihrualin tlarhmaa awm Siaha tlangval MC-a'n goal khat chauh la khung mah se a khelh ṭhat ṭum chuan tluk loh a nei bik lo.