London Derby Tottenham khelmualah Chelsea an lut dawn

International match an khel zo a, kumin chhungin ram tana inlanna tur a awm tawh rih dawn lo. Tun kar tawp hian club football en tur a awm chhunzawm dawn, English Premier League zinga ngaihven hlawh ber chu zanin dar 11:00-a Tottenham Hotspur khelmuala Chelsea an lenglut tur hi a ni.

Tun dinhmunah Chelsea hian point 28 hmuin pathumna an ni mek a, an hnuai chiaha awm Tottenham nen an inthlauhna chu point khat chauh a ni. EPL-ah team ṭha an tam a, a sang pali zinga tel tur chuan chetsual fo a thiang lo - London club pahnih hian nomawi chawi an duh a nih chuan an elpui club hneh hi a pawimawh zual dawn.

Hneh theih loh?

Maurizio Sarri-a'n Chelsea a enkawl tirh khan mi tam tak rin a hlawh zo lo a, season ṭan dawn khan a player ṭha tam zawkin training an zawm tlai bawk. World Cup khel zing aṭangin ṭhenkhat chuan Premier League match hmasa lam an khel hman lo hial.

Amaherawhchu, Italian manager hian Blues a enkawl chinah danglamna a thlen chho mek. Inelna hrang hranga an match hnuhnung 18-ah tlawm an nei lo a, league bikah match 12 an khelh tawh chinah chak loh an la nei lo - Spurs laka tlawm ngawt chu an inring hauh lo ang.

Chelsea hian an player ṭha bera chhal ngam Eden Hazard an chhawr thei dawn a, Belgium international hi Chelsea tlarhma thuam chaktu a nih bakah inkhel khaikhawmtu pawimawh a ni bawk. Sarri tana lawmna ti zual turin tun hnaiah Alvaro Morata a khel ṭha bawk.

"Alvora hian goal khung a mamawh a, a khung a nih chuan inrintawkna a neih belh zel ang. Theihna a neih san avangin a lakah ka hlauthawng ngai lem lo," tiin Sarri hian a striker chungchang a sawi tawh a, Spain international hian Tottenham lakah inkhel bul a ṭan a rinawm.

Blues player zingah ram tana fehchhuak ten Ningani khan training an zawm kim leh ṭhap tawh a, England leh Croatia inkhelh ṭuma inlan lo Mateo Kovacic pawhin harsatna nei loin training a zawm tawh. Uruguay laka chakna goal awmchhun khungtu Olivier Giroud pawh Spurs hmachhawn turin a inpeih bawk.

Poch a fimkhur

Mauricio Pochettino-a'n team khauh tak din ṭhin mah se league nomawi erawh an la hlawh chhuak thei lo. Zanin hian hliam vangin defender Davinson Sanchez, midfielder Mousa Dembele leh Danny Rose te an la chhawr thei dawn lo; Jan Vertonghen erawhin full training a zawm theih tawh avangin mamawh chuan chhawr theih tur a ni.

Tottenham hian Chelsea an hmachhawn zawh hian Champions League group match pawimawh takah Inter Milan an hmachhawn dawn a, kar leh tawp hian an hmelma kumhlun Arsenal nen North London Derby an khel zui leh dawn bawk.

Spurs manager Pochettino chuan, "Chelsea lakah rilru 100% kan pe tur a ni a, Inter Milan leh Arsenal te kan ngaihtuah tel a ngai rih lo. Match khat kan ngaihtuah phawt ang a, chumi hnuah team dang atan rilru ka seng leh chauh ang," tiin a sawi.

Poch hian an khingpui tur Chelsea ṭhat zia a hai lo a, an tan fimkhur a ngaih thu a sawi bawk. Argentine manager chuan, "Kum khat leh a chanve liam ta mai khan Chelsea hian Premier League nomawi an chawi a, an champion ṭuma an player kha an la kawl bakah squad ti chhah zual turin player thar an lak belh zel bawk.

"Inkhel harsa tak a ni dawn a, anni aia ṭha zawka khelh ngei kan tum tur a ni. Mahni khelmuala khel tur kan ni a, mipui ṭhutna hnawhkhat tur fans an pungkhawm a nih ngat chuan kan thahrui pawimawh an ni leh ngei ang," a ti.

Tottenham tan striker Harry Kane chu England tana a fehchhuahna lamah a che ṭha a, ram tana a khelhpui Dele Alli bakah midfielder Christian Eriksen a dam ṭha tawh bawk - Spurs hian an khelh fuh ni an tawng a nih chuan Chelsea hneh thei tur player an nei ṭha tawk.

Premier League Fixtures
Inrinni zan
Brighton & Hove 08:30 PM Leicester City
Everton 08:30 PM Cardiff City
Fulham 08:30 PM Southampton
Manchester United 08:30 PM Crystal Palace
Watford 08:30 PM Liverpool
West Ham United 08:30 PM Manchester City
Tottenham Hotspur 11:00 PM Chelsea
Pathianni zan
AFC Bournemouth 07:00 PM Arsenal
Wolves 09:30 PM Huddersfield Town