Champion BCA an chungnung
Mizoram Super League champion Zarkawt BCA chuan final lut turin an kawng chanve an zo ta. Ningani zan semifinal Game 1 inkhelah BCA hian 94-83 in Mission Veng Vikings an hneh a, point 24 score tu Cameron Anderson chu MSL a khelhna hmasa berah Veedol Player of the Night atan thlan a ni.
November 29, Ningani zanah semifinal Game 2 khelh a ni leh dawn a, BCA hi an chak nawn a nih chuan an tlang tawh dawn. Vikings lamin hnehna an chang let thei a nih chuan December 6-ah Game 3 khelh a ni ang.
A hming chu Anderson
Zarkawt BCA hian nomawi humhim an tum a, chumi atan chuan player ṭha pawh an lakhawm nasa. MSL-ah state pawn player ṭha kan hmu fo tawh a, a ṭha fal pawh an awm ngei mai - BCA player thar Cameron Anderson hi Mizo mipui te tan en tham bik a tling dawn chiang!
Virginia, United States aṭanga chah luh Anderson hian Hawl Indoor Stadium, Republic Vengthlanga a match hmasa ber a khel chauh a, court-ah a luh aṭang second 20 hnu lekah three points vawm lut nghalin, inkhel a zawh meuh chuan point 24 a score tling hman bakah rebounds vawi 10 lain double-double a nei nghal.
Zarkawt BCA coach Lalruatfela chuan, "Anderson hi a rawn thlenna a la rei lo a, player ṭha bik a nih avangin a chungah rinna nghatin kan luh tir nghal. Europe-a inkhel kual tawh a nih avangin a mikhual lo," tiin a player thar chungchang Vanglaini a hrilh. Feet 6 leh inches 8 zeta sang hi club dang tana ngaimawh tham a tling dawn niin a lang.
MSL champion tan tawnhriat ngah Lalrina Renthlei a pawimawhna a la ngai reng a, Tuikhuahtlang tlangval bakah hian tharum ngah Dennis Lalmuanpuia leh skills nei ṭha Zonunsanga te chu team tan thapui pawimawh an ni.
Vikings an zuih
Semifinal Game 1-ah hian Mission Veng Vikings lamin inkhel bul an ṭan fuh zawk a, Lalruatkima Sailo chuan point hmasa ber score-in Lalhmachuana chuan three points a rawn nei zui nghal zat bawk.
MSL-3 champion hian league round lama an hneh tawh lakah chak nawn an tum a, chawlhlawk hman a nih lai pawhin 42-46 in hma an hruai. Mahse, quarter hnuhnung pahnihah a hniam zawk an nih avangin chak lo zawka an ṭan a ngai.
Vikings manager H. Lalhruaitlunga chuan, "Player ṭhenkhatin tawnhriat an la ngah tawk lo a, hun pawimawh laia kan hnufual kha kan tawrh phah ta a ni," tiin Vanglaini a hrilh a, Mission Veng Vikings chhungkua te ṭawiawmna vanga lawmthu a sawi rualin, an inkhelh leh hunah beiseina an la neih thu a sawi bawk.
Chak lo mah se Vikings tan beisei a la bo vek lo. India ram sipai ṭhate basketball hmanga inelna huanga lang phak Hmachhuana chu BCA tan ven tham a tling a, Ramthar Veng tlangval hian point 19 a nei thei. Boruak san laia buai lo Dijon Najee Farr (28 points) nen an inkawp fuh chhunzawm a nih chuan final lut thei turin theihna an nei.