East Bengal hi kan bul ṭanna tur a ni - Gift

Aizawl FC-in vawiin chawhnu dar 2:00-ah East Bengal an mikhual dawn a, tun season-a chak la nei lo AFC coach Gift Raikhan chuan, "East Bengal hi kan bul ṭanna tur a ni," tiin thil thleng thlak danglam nan Kolkata club lian hneh a tum.

Gift chuan Kolkata club dahsang duh loin, "Match hnuhnung bera 2-1 a Chennai City ngam lo ve ve kan ni a, enge kan danglamna chu?" tiin East Bengal a cho hle.

East Bengal hian match thum an khelh tawhah vawi hnih hnehna changin vawi khat an tlawm a, Aizawl FC lakah tlawm an tum bik lo. East Bengal coach Alejandro Menéndez chuan, "Hnehna kan chang thei ngei ang tih ring chungin he hmun hi kan lo pan a ni," a ti.

Quess enkawlna hnuaia awm East Bengal hian sum an ngah thar avangin khelmual pawn thlengin hmasawnna tam tak hmuh tur a awm a, a zawna match hnih tlawm an hrethiam lo ang.

Mizo panga

East Bengal-in Mizo panga Lalrindika Ralte, Lalrozama Fanai, Lalramchullova, R. Laldanmawia leh Brandon VL Remdika te an nei a, Alejandro chuan, "An vai deuhthawin in hmu ang," tiin Mizo player chhawr a tum thu a sawi.

Mizo player zingah Didika tih loh chu Aizawl FC tana lo khel vek tawh an ni a, Armed Veng tlangval Chullova'n, "Dante-a leh Brandon hnenah goal khung ngei rawh u tiin ka hrilh," tiin Vanglaini a lo hrilh tawh.

Brandon chuan, "Ka ṭhianpa beiseina hi tih hlawhtlin ngei ka tum. Aizawl FC hi ka club hlui a ni a, hun duhawm tak ka hmanna a ni. Mahse, tunah chuan East Bengal tan ka khel tawh a, theihtawp ka chhuah dawn a ni," tiin a club hlui hneh ngei a tum.

Player an dam

Kolkata club tan match hnu-hnung bera Chennai City an hneh loh ṭumin striker Enrique Esqueda chu hliam vanga lakchhuah a ngai a, Real Madrid B team boss hlui Alejandro chuan, "Esqueda a dam tawh a, buaina tur a awm lo. Season bul ṭantu player chu an dam kim vek a ni," a ti.

Mexico tana vawi kua inlan tawh Esqueda hian league match thum a khelhah goal thum a khung tawh a, AFC tlarhnung tan hna siam turin a ṭha tawk. Tlarhnungah Granada defender hlui Borja Gómez leh Costa Rica tana World Cup match zawng zawng inlan vek Johnny Acosta te an awm a, AFC tlarhma lama Léonce Dodoz leh Ansumana Kromah te tan hna a harsa dawn tihna a ni.

East Bengal hian midfield-ah Mahmoud Al Amna chu hliam vangin tun season-ah an la chhawr thei lo a, midfield-ah beisei an la phak lo. Didika chuan, "Foreigner pathum chiah kan la chhawr thei hi kan chak lohna a ni," tiin Vanglaini a hrilh a, East Bengal hian hrem an nih avangin player an lei thei rih lo - December 1 aṭangin an bazar ṭan leh thei ang.

Mangṭha social media!

Aizawl FC-in league match nga aṭangin point hnih chiah an la nei a, beisei an phak lo tih hai rual a ni lo. Mizo club captain Alfred Jaryan chuan, "Social media lamah sawiselna a ri nasa em em a, hei hian player a ti hnual thei a ni.

"Player naupang zawkte hnenah pawh social media hmang tam lo turin ka hrilh a, a pawimawh ber chu mi min sawiselna ni loin keimahni kan inrintawkna hi a ni," tiin a sawi a, inrintawkna nei tura theihtawp an chhuah thu a sawi.

Gift a inringtawk

Tun season-ah Mizoram Premier League leh I League-a in nan avangin Aizawl FC tan fixture a hautak a, vawiin an inkhel tur erawh MPL-a an match hnuhnung ber nen a karah ni li a awm.

Aizawl FC coach Gift chuan, "Ni li chawlh kan nei a, tun season-a chawlh kan neih rei ber ṭum a nih avangin player-te pawh an rilru leh taksa thlengin a hahdam a, inkhel turin kan inpeih a ni.

Mahse, buaina kan la nei cheu a, kan player-te an dam kim lo. Kan defender Kareem Omolaja chu 100%-in a la fit thei lo," a ti.

Manipur coach chuan sawi-zawmin, "Kan chak lohna lai apiang kan thuam ṭha zel a, theihtawp kan chhuah a ni. Neroca kan enkawl lai khan match li kan tlawm a, pahnihna kan la ni thei," tiin I League table mawngah awm mah se thil an thlak danglam theih a rin thu a sawi.