Liverpool tan Mane a rinawm

Premier League club Liverpool forward Sadio Mane chuan Anfield-ah contract thar a ziak a, a contract rei zawng hi 'hun rei tak chhung atan' tih bakin tarlan ni lo mah se kum 2023 thleng ni tura ngaih a ni.

Kum 26 mi forward hian kar khatah £150,000 chuang a hlawh dawn niin khawthlang media-te chuan an tarlang a, Reds player hlawh hnem pawl a ni ang.

Senegal international chuan, "Liverpool-a ka contract ka pawtsei thei hi ka lawm takzet a, ka tan chuan ni duhawm tak niin ka career-a thutlukna ka siam fuh ber a ni," tiin Anfield-a a cham thei chu a lawm hle.

Mane hian June 2016 khan Southampton aṭangin Liverpool hi pound mak-taduai 34-in a zawm a, kum nga chhung atan contract a ziak.

Liverpool tan match 89-a khelha goal 40 khung tawh forward chuan, "Ka sawi fo ṭhin a, he club ka zawm dawn khan ngaihtuahna sen rei ka ngai lo. A hunah tak club dik tak an lo lang a, coach ṭha takin min kaihruai bawk," a ti.

Reds manager Jurgen Klopp chuan, "Sadio-te ang player duh lo hi Europe-ah an awm ka ring lo. Kan hnena cham zel a duhna hian kan club dinhmun chiang takin a sawifiah a ni," tiin a lawm thu a sawi.

Liverpool hian zanin dar 8:30-ah Premier League match an khel dawn a, khualmualah Watford an lenchilh ang.