Atletico khelmualah hmahruaitu Barcelona

Zanin dar 1:15-ah La Liga in­khel hmuhnawm a awm dawn a, Atletico Madrid chuan hma­hruaitu Barcelona an mikhual dawn.

Season dang zawng aiin Spanish La Liga-ah team che ṭha fal sawi tur an awm lo a, hmahruaitu ber Barcelona pawh hi match 12 an khelhah vawi hnih ngawt an tlawm tawh!

Atletico Madrid hi table-ah pathumna ni mekin Barcelona an phak lohna chu point khat chiah a ni - zanin inkhela chak zawkin hma an hruai ang.

Real Madrid-in coach thar Santiago Solari hnuaia an match hmasa ber an khel ve dawn bawk a, vawiin tlai dar 5:30-ah Eibar an lenchilh dawn a ni.

Rin loh lam

Barcelona hian an league match hnuhnung berah rin loh takin Real Betis chu 3-4 in an hneh lo a, Atletico leh Real chet chhiat season a nih avangin Barca hi an la vannei rihah a ngaih theih chauh zawk.

Catalan club hian match 12-ah vawi sarih chiah hnehna changin vawi hnih an tlawm a, vawi thum an khingpui an inhnehtawkpui - season dang chu ni se Barca ang club tan chuan 'che chhia' tia sawi chi an ni tawh a, Atletico leh Real chet chhiat an vanneih pui.

Mahse, Barca hi February 2010 hnuah Atletico lakah league match bikah an la tlawm ngai lo a, hriat tel atana ṭha erawh an inkhelhna tur hmun hi Wanda Metropolitano a ni tih hi a ni.

Atletico hian an khelmualah hian tun season La Liga-ah tlawm hmel an la hmu miah lo a, vawi nga chakin vawi khat an draw - Barca laka tlawm an duh dawn lo.

Atletico ve thung

Madrid khaw club hian tun season-ah an beisei ang result an la nei bik lo. League match 12 khelh tawhah vawi khat chiah la tlawm mah se vawi nga an khingpui an inhnehtawkpui tawh a, champion tum ngam team tan result ṭha a ni lo.

Atletico hian an match hnu­hnung berah Athletic Bilbao chu 3-2 in hneh mah se si phurh suttu zawkah zel an ṭang a, injury time-a Diego Godin goal khung hmangin an chak hram.

Tlarhma nei ṭha Barcelona lakah Atletico tan fimkhur a ṭul dawn tih a lang chiang a, hliam vanga a lo kirna match hmasa bera goal hnih khung nghaltu Lionel Messi ven uluk a ṭul zual ang.

Atletico ṭantute tana thu hriat nuam lo chu Nilaini zanah Cham­pions League match khel tura Monaco an hmachhawn lehnghal ngai tur hi a ni a, inhnaih taka game harsa khelhin team-ah nghawng a nei ṭhin.

Rakitic tel loin

Barcelona tan midfielder pawimawh Ivan Rakitic a inlan thei dawn lo - league match hnuhnung berah red card a hmu a, international break-ah ram tana a inlanna lamah a inhliam bawk.

Midfield laiah Arthur leh Sergio Busquets te chu inkawp tura beisei an ni a, Real Betis laka goal khungtu Arturo Vidal tan hmun a awm mai thei bawk.

Philippe Coutinho chuan hliam a neih hnuah Thawhlehni khan club training a zawm ve leh tawh a, zaninah Atletico Madrid a hmachhawn a nih pawhin a mak lo ang.

Tlarhmaah Luis Suarez leh Lionel Messi ten buaina an nei lo a, Coutinho a dam ṭhat bawk chuan an pathum inkawp hma­chhawn hi tu defender mahin an chak a rinawm loh.

Dam kim lo

Atletico Madrid-in an ṭhat dan berin Barcelona an mikhual thei dawn lo. Tlarhnungah captain Diego Godin chu hliam vangin a inlan theih a rinawm loh.

Uruguayan defender hian Bilbao lakah khan hliam nei chungin substitution an hman zawh tawh avangin a tawp thlengin a khel zui a, a tel loa khelh hi Aletico tan a harsa dawn tih a chiang.

Atletico tan Koke leh Tho­mas Lemar te chu hliam vangin an inlan theih a la rinawm loh a, Angel Correa, Thomas Par­tey, Rodri leh Saul Niguez-te midfield-ah an inkawp a rinawm.

Tlarhmaah An­toine Griez­mann chu innghahna tur a ni leh dawn a, Diego Costa a awm dawn bawk avangin Barca tana harsatna thlen turin an ṭha tawk ang - hriat tel atana ṭha erawh Costa hian an league match hnuhnung 18-ah goal a khung tawh lo.

Solari leh Madrid

Real Madrid-in coach thar San­tiago Solari hoa an match hmasa ber an khel dawn a, an lenchilh tur hi Eibar an nih avangin hnehna chang ngei tura beisei an ni.

European champion hian beisei ang result an neih loh avangin coach Julen Lopetegui an ban a, Solari chu manager lailawk atan ruat a ni - match liah hnehna a chanpui vek avangin coach nghet atan lak a ni.

Solari-a'n Real a enkawl tirh khan table-ah pakuana an ni a, tunah erawh palina an ni tawh - hmahruaitu Barca chu point li chiahin an phak lo tawh!

Real hian zaninah hnehna an chang a nih chuan Barcelona leh Atletico an inhmachhawn dawn bawk avangin champion an sawi ri ngam leh tawh ang.