LDFA Winter Cup Zotlang FC an thiam ber

Lunglei District Foot­ball Association buat­saih LDFA Winter Cup 2018 chu nimin khan Ṭhuamluaia Mualah khelh zawh a ni a, nomawi in­chuhna inkhelah Zotlang FC chuan 2-1 a Bazarveng hnehin an champion.

Team pahnih an inkhel tawk a, F. Lalrozara kaihhruai Zotlang hian chawlhlawk hma chiahin Joseph Lalvenhima hmangin goal hmahruai an khung a, winger Lal­venhima hian goalkeeper Lalhriatpuia rawn chhuah hmang ṭangkaiin goal ruakah a khung, tun hnai a hneh theih loh lakah hma an hruai avangin an phur thar hle.

Chawlhlawk hman hnuah Zotlang bawk a chefuh hmasa zawkah an ṭang leh, Mizoram Premier League club Electric Veng aṭanga an lakluh M. Lalrintluanga chuan minute 63-naah freekick aṭangin an goal hnihna a khung bawk.

Bazarveng lamin si phurh sut tumin thapui an thawh a, mahse defender Anthony Vanlaltluang chu yellow card vawi hnihna hmuh avangin hnawh chhuah a ni a, hun tawp tlengin an tho chhuak zo tawh lo.

Tun hnai LDFA hnuai final lian pathumah team pahnih hi an inhma­chhawn a, Lunglei Super League final vawi hniha chak lo zawk Zotlang tan hun ṭha a inherchhuak ve ta a ni. Zotlang hian hlawhtlina chang tur hian October thla bazar lai khan player 16 ngawt an ziak lut thar a, an thawhrimna leh hmalakna a par chhuak.

LDFA Winter Cup hi I Division club pariat tana buatsaih a ni a, league round lama an inkhelh kual vek hnuah a sang pahnih ten semifinal lutin, nomawi inchuh tur an zawng chhunzawm a ni.