Man City-ah Guardiola a nghet Zaninah Spurs Vs Man City

Manchester City-in manager ṭha bik Pep Guardiola an chelh. Spanish manager hian kum hnih dang contact ziakin Etihad Stadium-ah kum 2023 thleng a cham dawn a, Premier League-ah Lionel Messi hmu thuai tura inngaitu pawh an tam nghal hle.

Khawvel player ṭha ber ti hiala an chhal ṭhin Messi chungchang hi chu thuthang chauh a ni a, thuchiang erawh zanin dar 11:00 hian Guardiola enkawl Man City-in Jose Mourinho kaihhruai Tottenham Hostpur an tlawh dawn.

Manager pahnih hi La Liga aṭanga inhal tawh an ni a, Man City chungah Spurs an awm lehzel bawk nen, zanin inkhel tur hi a chhehvel nen lam a ngaihnawm vel vek a ni.

Pep Guardiola hian club pakhat a enkawl rei ngai lo, bul a ṭanna Barcelona-ah pawh season li chhung chauh a cham. German club ropui ber Bayern Munich enkawl lehin kum thum hnuah chona thar hmachhawnin Man City a zawm.

Spanish manager hian a contract neih ang hi a hmang zo a nih chuan kum sarih a cham dawn tihna a ni a, Barcelona leh Bayern aiin hun a hmang rei zawk dawn.

Pep hi Man City chhuahsan tur anga sawi a awm ṭhin a, amaherawhchu Spanish football hrechiangtu Guillem Balague chuan chhuah tumna a neih ngai loh thu a sawi.

Balague chuan, "Juventus, Paris St-Germain leh club dang aṭangin sawmna chu a hmu ngei a, amaherawhchu Man City-ah a hlim miau avangin chhuah tumna a nei ngai lo.

"City-a a thawhpuite a ringtawk a, team kaihhruai chungchangah thuneihna a nei a, Bayern leh Barcelona angin dressing room-a thil thleng hmun dangah a chhuak ngai lo," tiin Pep-a dinhmun a sawifiah.

Man City hi Guardiola hnuaiah hian match 245-ah match 181 an chak a, an chak percentage hi 73.87%. a tling pha. Spanish manager chuan, "Beng sikin kan ngaihtuah a, keimah leh club tan contract ka ziah hi a ṭha zawkah kan ngai.

"Chairman vangin contract ka pawtsei tiin a sawi theih a, kan inbiaknaa a thusawi khan hma kan sawn zel theih rinna lian tak min pe. Hma chhawp zawh loh kan nei a, hna ka la neiah ka ngai," tiin a sawi.

Nakkum January 24-ah Barcelona-in President thlanna an nei dawn a, Guardiola lak let hi Catalan club President nih tumte au hla pakhat a ni. Amaherawhchu Pep-a'n contract a pawhsei takah chuan campaign au hla atan a hming lam rik a rem tawh lo ang a, Lionel Messi chelh chu au hla ṭha zawk a ni thei ang.

Kumin nipui bazarah Argentine forward Messi-a'n chhuah a tum a, thuthang a ni lo - thil tak tak a ni. Messi-a'n Catalan club a chhuahsan loh chhan hi amah siam liantu a club hmangaih hi court-a a khing theih loh vang a ni a, nakkum nipui transfer-ah chuan a chhuah ngei an ring.

Messi hian Man City a zawm dawn chuan Pep Guardiola leh Sergio Aguero te contract pawhsei a ngiat tih an sawi - Guardiola-a'n contract a pawt sei a, thuthang hi a dik a nih chuan Premier League-ah Leo kan hmuh hmel ta hle.

Guardiola hian chairman Khaldoon Al Mubarak nen an inbiak hnuah a rilru a hmin thlap thu a sawi a, Man City hotute hian Messi lakluh an tiama ngaitu an awm bawk.

Spanish manager hnuaia Messi-a'n season a hman tluan hnuhnung berah match 60 khelin goal 73 a khung a, assist vawi 33 a nei. Hemi a nih avang hian Messi hian Barca hi a chhuahsan a nih chuan Man City bak pan tur a nei loah a ngaih theih.

Kum 49 mi Pep awm hnuah English football kalhmang a inthlak a, Liverpool manager Jurgen Klopp nena inelna boruak nung ṭha tak chuan Premier League a ti hmuhnawm hle. Klopp hian kum 2024 thleng Reds-ah contract a nei a, hun engemaw ti chhung chu an an inel chhunzawm dawn.

Premier League-ah khawvel manager ṭhaa chhiar phak Marcelo Bielsa, Jurgen Klopp, Jose Mourinho leh Carlo Ancelotti te bakah Mizo chhungkaw nawlpuiin TV an neih hnua vanglai hmang Frank Lampard, Ole Gunnar Solskjaer leh Mikael Arteta te an awm a, English football a vul zel dawn.

Jose Mourinho hi manager ropui tak a ni a, record thlir let chuan Portuguese manager hian Pep Guardiola a tluk lo.

Manager ṭha pahnih hi vawi 23 an inhmachhawn tawh a, Guardiola hi vawi 10 a chak laiin Mourinho hi vawi ruk a chak thung. An intawn hmasak ber chu Mourinho-a'n Inter Milan a enkawl laiin a ni a, September 2009 khan goal awm loin Pep-a enkawl Barca nen an inhnehtawk.

Guardiola a chungnung chho a, amaherawhchu tun hnai bikah Mourinho record a ṭha zawk. An intawn hnuhnung vawi kuaah Mourinho vawi li a chak a, Pep hi vawi thum a chak. 

Kumin Premier League thlir pawhin Mourinho hoten point an hmu hnem zawk a, khelmualah pawh an hmuhnawm zawk. Spurs-in Harry Kane, Son Heung-min leh Gareth Bale te an kawl a, Man City lakah an inkil tawih lo ang.

Hriat tel tur erawh Tottenham fixtures a harsa dawn. League match an khelh tur match sarih zinga match ruka an hmachhawn turte hi season liam taa a sang pariat zinga mi an ni a, chungte chu Manchester City, Chelsea, Arsenal, Liverpool, Leicester City leh Wolverhampton Wanderers te an ni.