Fing taka chet tum Claudio Ranieri

Fulham boss thar Claudio Ranieri chuan fing taka player a thlak kual ṭhin tur thu a sawi a, "Tinkerman tiin min hria a, mahse uluk takin player ka siksawi ṭhin," a ti.

Kum 67 mi manager hi Chelsea a enkawl laiin pla­yer a siksawi nasa ṭhin a, hei vang hian 'Tinkerman' tia hminglem pek a ni hial.

Ranieri chuan, "Match ṭhenkhatah chuan line-up ngai hman a ṭul ṭhin. Ka duh ber erawh player zawng zawng dam kim se, duhthlan tur nei reng ila tih hi a ni," a ti.

Premier League-a khaw­vel barakhaih chunga Leices­ter City lo champion pui tawhtu coach hian thla tir khan Slavisa Jokanovic thlakin Fulham hi a enkawl a, a hna hmasa ber tur chu Premier League mawngphah aṭanga a team khaichhuah hi a ni ang.

Italian manager chuan, "Ka player-te chu an inkhelh tawhna video te en tirin an tih dik leh dik lo te ka entir a, khelmualah hei hi zir chhunzawm lehin zawi zawiin hma kan sawn ve zel a ni," tiin a sawi.

Fulham hian zanin dar 8:30-ah Southampton an mi­khual dawn a, Ranieri hoa an match hmasa ber tur a ni ang.