Chelsea-ah N'Golo Kante a nghet

N'Golo Kante chuan Chelsea tan a rinawm zia lantir nan kum nga daih contract a ziak thar a, France international midfielder hian London club tan hian kum 2023 thleng a khelh chhunzawm dawn tihna a ni.

Kum 27 mi Kante hian 2016 khan Leicester City aṭang­­in Chelsea hi a zawm a, Blues tan Premier League match 81 a khelh aṭangin goal thum a khung tawh - goal khung lamah langsar lo mah se a ṭhatna ber chu defender tha ti chaktu a ni a, inkhel khaikhawmtu pawimawh a ni.

Stamford Bridge-a pan kumah Kante hian league nomawi a chawipui nghal a, Professional Footballers' Asso­ciation Player of the Year atan thlan a ni zui bawk. Kante chuan, "Kum hnih nuam takin ka hmang ta a, hun rei zawk hma chhunzawm zel ka duh.

"He hmuna ka rawn kal aṭang hian player ka nihna ang pawhin hma ka sawn hle a, chawimawina hlu tak tak pawh ka dawng tawh. London khawpui hi nuam ka tiin he club tana ka khel chhunzawm thei tur hi ka lawm hle," tiin a sawi.

Kante hi France tan pawh match 36 a inlan tawh a, FIFA World Cup champion an nih theihna tura player rinrawl leh pawimawh a ni phak bawk.